早前容祖兒同好友關智斌（Kenny）到北海道旅行，更將影片剪輯成「斌祖二世古」，分享兩個密友於旅途中嘅趣事。最後一集中，二人除咗瘋狂買手信外，亦訴心底話。原來早於十年前，Kenny寫咗首歌俾祖兒，呢個秘密埋藏喺Kenny心底足足十年！
Kenny憶說有一年頒獎禮，祖兒為女歌手大熱，但網民就話要集氣「噓」佢。頒獎禮當晚宣布祖兒得獎時，真係被人喝倒采，祖兒表示當年說話言詞較為衝動：「因為覺得有責任去保護我嘅朋友、同事。」為此，Kenny就填寫歌詞《勇氣情歌》鼓勵祖兒。
祖兒聽完即感動地話：「冇諗過佢會識填詞，而且係為我而寫，感動已經唔能夠去形容到我嘅心情。我哋都係睇住對方成長、睇住大家經歷過啲乜，呢份友誼真係好難得。我真係好希望演唱會上可以唱到呢首歌。」
而Kenny亦解釋點解遲遲唔將「秘密」公開：「因為我個人比較內斂，亦都覺得唔好意思。」佢仲話其實佢好鍾意填詞，以往每隻碟都會有自己嘅作品。問到佢仲有乜嘢想同祖兒講，Kenny話不如唱出嚟，「朋友嘅嘢心照啦，我哋好少講出口，我哋通常唱出嚟，希望我再有機會為佢寫隻歌，用歌講俾佢聽。」
部分圖片來源：容祖兒@Instagram