拍過不少電視及平面廣告，於近日ViuTV熱播劇集《弊傢伙！我要去祓魔》，亦有份演出的KOL黎紜蔚Vivian（肥肥人），今日（7日）正式出道成為歌手，首支派台歌曲及MV《曖昧日誌》亦同日上架。
2019年入行的肥肥人，畢業於香港浸會大學傳理系，大學時代已兼職廣告模特兒，曾拍攝近百個平面及電視廣告，近年肥肥人不時於IG上載唱歌短片，深受粉絲喜愛。原來肥肥人自八歲起，於粵劇團學習唱歌六年，逐漸培養歌唱興趣，「小學時收到學校通告上興趣班邀請，被爸爸強迫學習一門偏門技能，話大個之後話唔定令我與眾不同！開頭都覺得悶，學咗六年就被爸爸停止，因為升中功課繁重，但當時已鍾意咗唱粵曲，要停止興趣班反而傷心。」她謂雖然粵曲跟流行曲看似極端，但技巧上亦有共通點，亦有很大幫助，「音域少啲限制，比較容易上到高音，頭腔共鳴更容易發聲，同埋因為從小習慣用丹田氣講嘢，所以唱流行曲一樣可以自然用到。」
現今做歌手難搵食，為甚麼要堅持入行？她坦言做歌手是從小的夢想，「出一首歌差唔多要六位數字，所以真係唔係為咗賺錢！近年都有拍攝廣告、電視劇同電影機會，所以都一直有儲錢，加入歌手行列，令自己事業更全面。自己性格都好鍾意幫助身邊朋友，慰藉佢哋心靈；而歌聲可以傳遞更遠，慰藉更多朋友以外的心靈，就算我唔喺大家身邊，聲音仍然喺大家耳邊。」出道歌曲《曖昧日誌》講述少女渴望被愛，卻同時害怕愛情的矛盾，而這種不自信的初戀感，能帶給不少年輕聽眾共鳴，也是年長聽眾的懷緬。
肥肥人透露，當中亦有加入自己故事元素，「因為對於比較親密嘅朋友們，就知道我本來性格比較嬌嗲，當感到非常快樂，就會習慣喵叫一聲撒嬌，會引到佢哋大笑，所以就構思了男主人喺屋企養貓，而貓變成女人感受人類愛情故事。」MV中，肥肥人以貓女造型示人，加上網民經常將焦點放在她驕人身材上，怕唔怕大眾忽略她的歌曲？肥肥人直言唔怕，「唔怕大家focus落自己身材，因為身材比我好嘅人太多，相信日後有更多影視作品，大家就會轉放更多焦點，專注我才藝方面發展。」
