昨日（5日）陳家樂推出首支個人單曲《我們都是無名氏》，歌曲除了是他第一次推出的個人作品，更是他首次嘗試填詞。
提到歌曲創作靈感，原來跟他的婚禮有關。他指寫詞期間，發現很多曾經並肩的朋友，如今已經散落在不同的人生軌跡上，有些甚至連名字都記不起，但那份曾經一起奮鬥的感覺，一直留在心中，「我諗返起開始寫名去邀請朋友嚟我嘅婚禮，發現有好多人，其實我同佢已經好少聯絡，甚至只係有一面之緣，甚至可能連名都唔記得，只係嗰陣時我哋有共同目標、或者一啲共同奮鬥原因，大家好近，但過咗之後，大家就冇再聯絡，但係喺我想邀請佢嘅時候，我已經冇辦法再聯絡佢，所以開始形成咗呢首歌嘅構思。」他希望藉住這首歌，向這班「無名氏」說聲多謝。
歌曲製作班底，家樂直言要多謝太太連詩雅（Shiga），「呢首歌係我太太幫我搵咗佢嘅朋友、音樂夥伴Dear Jane嘅Howie作曲，同埋仲有一位方浩權，佢幫我執返啲詞再『靚仔』啲，因為我填完之後發現，字係啱音，但好難去唱出嚟，佢就幫我執靚啲，監製係琛哥，都係Dear Jane嘅監製，所以好多謝佢哋去幫我完成呢件事。」
MV方面，家樂找來好友導演簡君晉幫手，二人相識多年，當年家樂第一次任電影男主角，就是由簡君晉執導，而簡君晉的首部電影，亦是跟家樂合作，「佢亦都係電影《白日之下》嘅導演，佢好耐冇拍MV㗎啦，為咗我出山再拍MV，所以今次嘅MV對我嚟講係好有意義。」
家樂坦言，今次跳出演員身份，用音樂跟大家見面，是一個很大的嘗試，希望大家可以透過這首歌更了解他，「我好希望大家可以除咗喺電影世界見到我，亦都希望可以憑着歌曲，或者今次我填嘅詞，去更加了解陳家樂係一個有啲咩諗法嘅人。希望喺將來可以再同大家有多啲機會去傾偈，同埋我都好希望日後有機會，成為到人哋嘅『無名氏』，可以俾到一啲鼓勵同大家一齊去前行，繼續努力。」
