陳家樂與衛詩雅今日（5日）出席新店開張，原來兩人已兩年多未有合體搵錢，衛詩雅笑住投訴，「好耐冇一齊出嚟做嘢，兩年幾前有個活動，自從佢結婚後就搵連詩雅，唔搵衛詩雅，因為佢同老婆一齊出嚟新聞大啲，會襯啲，我同老公就襯啲。」
早前《第44屆香港電影金像獎》公布入圍名單，當衛詩雅讀到男主角名單中有陳家樂時，已忍唔住爆喊，陳家樂說：「嗰次我好緊張，我見到佢表情，好似有啲感覺，似有又似無，見佢激動好似有，之前我哋有講笑講如果開名單有冇都好，第一個要叫我，點知佢第一個叫張繼聰，令我覺得今年又無，我要調節返自己呼吸，結果好開心由佢口中知道，果然影后，演技有層次，自己被提名好開心，好想被人認同，可以俾同業認同係一種鼓勵。」
衛詩雅表示一定撐對方到底，「我一定會盲撐，我們其實一齊長大，入行第一套電視劇已一起合作，希望可以大家都有好成績。（至於自己有份提名女配角？）我有信心，但今年對我嚟講好似派對一樣，期待會多一些，我都有問老公今年會唔會陪我行紅地毯，因為陳家樂會帶連詩雅行紅地毯，我好想我哋可以四個人一齊喺紅地毯影張合照，好值得紀念一刻，老公話考慮一下，睇下要唔要工作。」不過陳家樂表示太太有可能因工作出埠，未能趕得切回香港，笑言考慮找女兒陪行紅地毯。
更多現場圖輯：
