詹天文（Windy）昨日（6日）出席《Windy詹天文 CHAPTER ONE LIVE IN HONG KONG》記者會，正式宣布將於下月11日在麥花臣場館舉行首個個人演唱會，現場吸引大批粉絲到場支持，場面熱鬧。
Windy於台上分享籌備演唱會的心情：「知道可以開騷嗰刻我仲喺度上緊堂，心情又開心又感動，真係百感交集。由參加《聲夢傳奇》到今日，一步一步行到呢度，好多謝公司、家人同所有粉絲嘅支持。」
她透露演唱會命名為「CHAPTER ONE」，對她別具意義：「上年我推出咗首歌叫《序章．結局》，每個人嘅人生都有一個序章。我呢幾年不斷裝備自己，ready好自己，呢個Chapter one就係要開一個屬於自己嘅演唱會，所以覺得特別有意義。」Windy表示演唱會將呈現她不同階段的成長與蛻變，希望歌迷能從中感受到她的真誠與熱情。
Windy透露目前已進入密集排練階段：「我想嘗試擺脫細路女嘅感覺，我已經大個女，唔再係當初嘅小妹妹，所以演唱會上嘅舞蹈會由Jazz轉做Hip Hop，帶少少型格。」她更預告屆時將有驚喜環節，並會特別設計周邊產品：「知道粉絲好想買嘢留念，我哋設計咗一啲特別嘅周邊，希望大家鍾意。」
專程到場支持的樂易玲對Windy讚不絕口：「呢個女真係乖到不得了。第一次見佢係14歲，而家高咗又愈嚟愈靚，好勤力讀書又叻，每一樣嘢交畀佢，佢真係超額完成。5月1號我哋喺天河體育館有個大型活動，安排Windy去做表演嘉賓，咁大個體育館，佢一開聲，好多領導都覺得佢好靚、驚為天人。可以想像到佢演唱會嗰陣會有幾出色，佢嘅歌聲比我哋預期中更加好，Windy嘅前途真係無可限量。而家先20歲，前面真係一條康莊大道，加油。」Windy聞言非常感動，回應說：「我愛你樂小姐，我一定會做好㗎！」樂易玲亦說：「我都愛你，你冇辜負大家，每年都同你開（騷）。」活動尾聲，Windy即場演唱歌曲《沒有你的新學期》，之後更走到台下與粉絲拍攝大合照，近距離互動。
Windy於記者會後接受《新城八大家》訪問，坦言心情既緊張又興奮，並透露每日都為個唱積極備戰：「我屋企樓下就有一個健身室，所以每日早兩個鐘起身去健身，希望自己可以fit得嚟又有肌肉線條。」她又透露目前已練出若隱若現的馬甲線：「其實我朝早起身用力收腹嘅時候係有少少嘅，但希望到時可以自然流露出來。」Windy笑言造型師曾問她想衣服短一點還是長一點，但她對自己信心未夠，要視乎情況再決定。
談到演唱會嘉賓，Windy大賣關子，表示會是「很神秘的嘉賓」，而且不止一位。被問到可有信心加場，她說：「期望！」提到與樂易玲在台上互相「示愛」，她說：「樂小姐真係好似一個媽媽，成日教我好多嘢，叫我努力，所以我真係好感謝樂小姐。」對於樂小姐預告會為她每年舉行演唱會，Windy理解為每一年都要再進步多一點：「我覺得我需要繼續裝備自己，呢個只係Chapter One，希望之後會有更多嘅Chapter。」
