為了復出鋪路，今次她自資5位數字出歌，「自資咗5位數字出新歌，叫《由自可》，香港人好鍾意咩咩由自可，香港歌手要多宣傳廣東話，調轉係可自由，主要講近排大家嚟緊都覺得世界未日，係一個預言，但使唔使咁驚？我覺得活好每一日就可以，總之唔好咁擔心，過份擔心對心理都有問題！我以前都好迷信，但依家信自己多，當時會玩塔羅牌及算命，但你去俾錢時都已經破咗財，我覺得有準有唔準，其實都係科學計到，曾經有講過我唔可以早婚，但因為遇到（前夫），所以都唔會記得人哋講過咩！」
今次自資出歌，她希望可以令人知道她復出，「要靠自己工作賺錢，好耐冇見大家，暫時未有其他工作，希望俾多啲人知我出嚟工作。自資出歌都吃力，但都要有新作品，如果唔係人哋都唔知你返出嚟工作，依家我每日都做直播唱歌，靠網民打賞收入，試過一個月有5位數收入，但手停口停。」
前夫羅章冠早前發文暗指「被背叛」，李蘊未有正面回應，「冇呀，唔講喇！依家大家關係唔錯，唔再講喇！」問到與前夫目前關係？她說：「同前夫好耐冇食飯，有時接送子女都會見到，不過為咗子女，唔好搞到咁僵，都需要顧返爸爸媽媽嘅身份，唔好令小朋友覺得唔好回憶，有時間小朋友生日或節日，都可以一家人食飯慶祝，小朋友跟爸爸在內地生活。」她表示目前與家人在香港住公屋，但在廣州亦有租屋住，她更強調：「自己每年都會依照房署程序填表申報！」
更多現場圖輯：
