李家鼎公開指控大仔李泳漢苛索金錢，身家被榨乾，並委托李泳豪任執行人，又公開多段錄音指證泳漢苛索200萬！泳漢直指一切皆是泳豪夫婦指使，目的是為爭奪父母家產，他公開錄音及片段力數泳豪三宗罪，包括軟禁、辱罵、封鎖父親經濟。
其中一段錄音鼎爺說：「佢一入到嚟閂窗閂玻璃，你唔好嘈、唔好郁，郁我嗌救命，嗌非禮㗎。」泳漢表示鼎爺所指的「佢」是Agnes。泳漢隔門勸鼎爺離開，並對他說：「點解你要咁聽佢講？係咪你唔聽佢話又要罰錢呀？啲錢轉晒佢Account呀？咁佢日日罰你都得㗎喎！佢根本搵藉口嚟攞你錢，同搶冇分別，你加佢名唔係Approve佢咁轉錢，咁係詐騙行為，我依家叫你行出嚟，你Stay喺度就愈多麻煩。」鼎爺回應：「我唔行得出去㗎！」並表示被泳豪夫婦軟禁在家。
另外，有段錄音泳豪說：「你最叻擘大眼講大話，講嘢冇公信力，事實擺在眼前，一毫子都冇嘅人，唔係你畀係邊個畀呀？你真係侮辱人哋嘅智慧，你會唔知？你乜都話唔知㗎啦！」
亦有Agnes的錄音：「燈油火蠟水電一個月都唔會超過3萬，你唔好同我扮嘢喇，你所有啲數，我哋都同你計咗㗎，你自己都寫過出嚟，你每3日就半隻雞，你淨係鍾意食蒸雞，咁可以用幾多錢呀？你又唔出街，你呢個月使多咗錢，就係買多咗個手提電話，因為你自己掟爛咗部手提電話，你冇其他消費，總之，聽清楚16萬6千幾，就係你7月至11月嘅生活費。我老公細個你點教佢㗎，畀你咁多就係咁多，你自己想用就自己想辦法，咁如果你冇錢仲碌卡，就要自己負責喇，你唔好唔記得咗，你嗰日趕趕趕，趕出去想撳錢，跟住你撞車呀，連個天都唔畀你做呢件事，你自己諗清楚。」
泳豪隨後回覆傳媒，回應泳漢的指控，他承認在錄音聲帶中，太太Agnes語氣粗魯，但起因很簡單：「因為阿漢成日問阿爺攞錢，攞到我哋都要睇住啲數，唔畀錢阿漢囉，阿爺又唔聽，咁有陣時言談之間就會忟憎囉。」他指父親五個月內花費16.6萬元，平均每月約3.3萬元，帳目混亂，「幾十萬幾十萬咁畀，條數太亂，講極唔聽。」才令太太Agnes覺得不正常，需要逐條對數。
對於他被指「粗聲粗氣」對待父親，泳豪承認屬實，但強調當時沒有爆粗，只是語氣較重，亦並非為爭產，主因是父親屢勸不聽、不停給錢李泳漢，更懷疑有人一直盜用亡母施明的信用卡，甚至在她留院及離世後仍有不明帳目未清。李泳豪透露，母親施明生前是馬會會員，持有一張聯營MasterCard，每月會費約3千餘元，但除此以外，一直有不明卡數未清，「我離開屋企之前，balance只剩好少，我Daddy一直有幫阿媽清數。」
而施明於2022年底在家中跌倒撞傷頭部，接受開腦手術後留院長達一年，在住院期間及出院後，仍有大量卡數需要清還。李泳豪質疑：「點解我哋咁勞氣，因為發現自從阿媽入醫院同出院之後，根本日日都係瞓牀或者無出街，但點解我阿媽張credit card，我老竇仲要幫佢還錢？即使今年，幾個月前發生呢一單嘢（母親離世）都仲還緊嘅。」
李泳豪直言對此感到非常奇怪：「理論上唔會再有交易，就算係都係媽咪入院前嘅transaction……我問老竇，仲係還緊張卡條數，咁我就覺得好奇怪，所以我哋咁忟。」他透露將尋求律師協助，往銀行查數。
針對泳漢指控他們掌控父親戶口、取走340萬元，泳豪強烈否認，並反擊：「佢（泳漢）成日提住340萬，有直接證據咪攞出嚟，唔好成日咬住我攞咗340萬。」
對於錄音中出現被指是鼎爺透露遭Agnes威脅「閂窗嗌非禮」的內容，泳豪為太太辯護：「真係要證明點閂窗嗌非禮，冇發生過點解釋？！」他強調有關指控從未發生，事實上錄音中鼎爺只是講出「佢」，並沒有指明是Agnes。
李泳豪批評泳漢公開的錄音是「一節節」，目的是抹黑他，刻意不提其他家事（如涉及200萬的事件）來轉移焦點。他無奈地說：「你又唔解釋嗰200萬，鑊鑊都係咁，佢Skip晒就隊人，你話我錯，你仲錯。」
