周殷廷（YT）日前化身「理財師兄」為中銀香港理財拍攝廣告，YT穿上簡約型格西裝，擺出多個型格甫士展現其成熟穩重的魅力。
對於今次擔任代言人，YT表示私下一直有了解理財資訊，更直言要「親力親為」管理資產：「因為我覺得理財呢樣嘢要自己去學習，無論係點都冇得賴，呢啲應該要有嘅知識嚟嘅，唔係俾咗人（管理）咁就算啦。」
講到理財心得，YT認為目標不一定要賺大錢，最重要是安穩無憂：「對我嚟講，理財就係可以好安定安穩咁樣過完呢一生，然後唔會冇錢。咁我覺得呢個就係一個好基本嘅概念囉。即係唔好講話賺大錢呀或者點樣點樣，但如果你正常打份工嘅話，你想去到你年紀大啲嘅時候都安穩無憂，我覺得呢個係非常緊要嘅一個步驟。」YT笑言除理財外，管理時間亦非常重要，「依家最寶貴嘅財產係時間，透過時間亦都可以轉化為金錢。愈早開始學識理財投資，呢一樣嘢係好緊要嘅。你簡直係無敵㗎，只要你有時間，你就已經贏咗㗎喇！」
雖然平時拍MV經驗豐富，但YT自爆拍廣告時會緊張：「我自問係完美主義者，加上自己有幕後經驗，知道導演、客戶有期望、有要求，即使導演話『Good Take』，心入面都會好緊張，由上場嗰刻一直喺度諗，我頭先係咪已經做到最完美，會唔會有嘢甩漏呢？」
YT日前亦為樂迷報喜，宣布將在8月紅館舉行個唱，Poster中YT以一身肌肉上陣，大騷「男人味」：「其實我唔係話今次演唱會特別操fit啲，平時一日都係食一餐飯，所以都習慣咗保持身形！今次紅館演唱會好多諗法，盡量唔講太多想俾驚喜樂迷。（會唔會跳舞？）呢個我會努力嘅，至於嘉賓真係未諗，要同Production Team開晒會先至拍板。」
