無綫下周一（17日）開播的新劇《奪命提示》，張振朗在最新宣傳片中，除展現了「踢出新高度」的踢腿神功，其中一幕「蟹爬大髀」，張振朗「既愛且恨」的誇張演繹，加上孖煙囪裝束非常搶焦，他笑言：「估唔到拉咗筋除咗喺拍動作嘅時候用得著，拍搞笑嘅場口都能夠大派用場。」
首次與張振朗演情侶的劉穎鏇（Tiffany）表示，除了要挑戰更多和更高難度場口外，還要應付不少內心戲及喊戲，坦言是其八年拍劇生涯以來喊得最多的一部劇集：「今次要喊嘅次數同程度，係突破晒咁多年以嚟嘅經驗。」以往她曾直認拍喊戲不容易，Tiffany表示隨著經驗的累積，自己確實比以前容易理解及進入狀態，並謂今次要特別感謝監製文偉鴻（Jazz）的循循善誘，以及拍檔張振朗的用心交流！
Tiffany說：「每次我哋拍呢啲感情戲，Jazz都會特別令到成個氣氛環境好安心，佢拍之前會問我哋係咪熟晒啲對白、係咪ready好，只要我哋ready好就會即刻拍，咁樣好俾到信心我哋，令我哋演起上嚟都有信心啲。至於振朗，呢套劇我哋好多場口都一齊拍，而好多時我哋都會事先溝通咗先，可能係度吓嘢又或者分享吓大家對唔同場口嘅睇法，次次我哋都好踴躍咁去討論點樣可以令成場戲更加好，會加好多細位同埋jam啲嘢出嚟，等啲有情緒嘅戲份可以更有support。」
