乳癌復發積極接受治療的吳文忻（Nathaliie），在最新的CT Scan報告並不理想，細胞變異擴散至肝臟並發現3cm腫瘤，再發現腦部左右兩邊各長了1cm腫瘤。
樂觀的阿Nat，主動提議與一班閨密舉辦一場溫馨的「生前追思會」，完成後她便再度入院，準備接受新一輪治療。本周，她前往深圳醫院準備第二次治療，可是持續低燒和白血球急跌，最後發現是肺炎，由於肺炎的併發症可大可小，原本阿Nat計劃在長假期與女兒staycation，可是現在需要留院觀察。
上月，阿Nat前往深圳進行新一輪治療，這次入院預計一星期，當時阿Nat透露︰「其實我依家上咗香港大學深圳醫院，我覺得依家on the right track，同埋身體都開始回復返，冇之前咁死！今個星期會做化療同試新藥，過多幾日就應該會返香港。」
她解釋：「我之前喺香港，真係覺得好似得返四分一條人命，依家就逐漸有返啲精神，同埋我仍然好深信，有一日會好返，所以繼續努力，加油。」
到了本周五（3日），阿Nat接受本刊電話訪問，她在電話中咳得很厲害，阿Nat說︰「因為之前打完第一次藥，返去香港之後就好多乾咳，今次上嚟suppose要打第二次化療，即係靶向化療（Targeted Therapy，標靶治療），但今次就打唔到，因為check咗我有少少肺炎，係呢個化療藥其中一個side effect，會影響個肺，亦係其中係一個symptom，肺炎就可大可小啦，呢度check到好嚴謹，同埋今次白血球好低，基本上所有化療藥都會令到白血球低，但係肺炎呢個問題就比較嚴重囉！」
原本阿Nat計劃在深圳留兩日，周五便回港，更已book好酒店跟兩個女兒staycation，可是現在要轉plan，囡囡亦十分貼心，跟媽媽視像「約會」，「本來想嚟住兩晚，依家唔知又要住多幾多晚，本來諗住weekend同小朋友去staycation，但係依家都唔得啦，呢幾日都keep住有低燒，即刻要處理咗肺炎部分先，同埋佢哋要find out究竟係邊一隻藥令到我有肺炎？定抑或係白血球低，所以感染到肺炎呢？因為呢隻藥其實係第一次試用，應該對我有幫助嘅，但如果真係會令到我肺炎，咁就要選擇停藥，唔可以再用呢隻藥。」
雖然今次未能進行第二次治療，但阿Nat體會到當地醫療的嚴謹，「呢度真係比較嚴謹，我有朋友今次上嚟都打唔到chemo，因為血小板低，佢都要食一星期藥，先可以再睇下次得唔得，同埋我呢個case都係take it seriously去check所有嘢！我之前亦有做過放療，即係電療，電療都有影響、會傷肺，而好多時併發症都係肺炎，啲人就走咗㗎喇！」
‧被訪者言論純屬個人意見，並不代表本刊立場