麥浚龍（Juno）今年才踏入男人四十階段。大家都看着他入行，當年那個又瘦又奀的金毛小子，唱着《愛上殺手》的模樣，與今天的Juno是兩個世界。一步一步進化，唱歌拍戲成為導演開埋公司做老闆，有Juno就有「新嘢」，他笑說自己是辛苦命，只為跳出舒適圈，不想重複自己。
下月22日在亞博舉行個人演唱會，命名為《金榜題名》更身兼導演一職，演藝事業早已榜上有名的Juno，今次又搞搞新意思，「可能真係辛苦命，硬係要去搵一啲嘢，我想挑戰自己創作可能性！」
這次主辦單位邀Juno開個人騷，剛巧那時Juno完成了一個電影劇本，腦海中出現了四個字，「今次呢個騷，我係圍繞『忠孝仁義』四個字，呢四個字我覺得尤其是亞洲人，有呢個傳統美德，粒粒字都好有分量。我覺得要做到呢四個字，可能大家都要經歷一啲身不由己嘅嘢，先可以成就四個咁堂皇嘅字。」
由忠孝仁義引伸出一個黑道故事，再有新歌《金榜題名》的誕生，以及演唱會的主題命名。Juno今次找來不少新單位合作，「《金榜題名》呢個意念想承載2024年頭發生嘅事情。流行曲式歌手，要講到呢個故事相對難啲，因為始終主流世界題材，離不開感情愛情，但呢個騷愛情元素比較低，相反情義元素就高！我開始接觸到近年hip hop界別，我覺得佢哋寫rap，佢哋寫自己成長故事、選擇嘅詞彙，首先年紀因應令佢哋有嗰種火同堅持，我覺得佢哋用嘅詞彙比較貼地，我就係需要呢種力量，我就係需要呢種直白！以往我歌曲上嘅合作，好多都係同我同輩，或者我嘅前輩，反而同一系列後輩合作相對少，今次單位比較多，我之外就係Novel Fergus、PetPetShawn、廿四味、Matt Force、王嘉儀，好多年紀都比較輕。」
唔係講得多粗口就得
《金榜題名》剛推出已被電台列為禁播歌曲，皆因歌詞出現粗口，不過Juno卻不以為然，「我都有諗過佢係咪合適所有媒介去播放，但我又覺得我職責係忠於命題同故事靈魂，至於邊個平台承載到、邊個平台承載唔到？對我嚟講唔係一個好天大問題，裏面係有粗口，但我唔覺得呢個粗口係大量，大家都清楚知道，唔係代表講得多粗口就講到件事，至於佢同平台承載問題，我覺得我都幾接受，我冇所謂！我會有一個乾淨版，但係好難撕得甩成首歌整個命題！」
停不了創作的Juno，他坦言不想重複自己，「我覺得我嘅崗位，有少少似個廚師，電影、顏色、擺設、美術、道具、剪接、配樂、聲效、演員，點樣用呢一系列素材，每個人處理方法都唔同。我覺得當其時《The Album》三年三張專輯呢個期望，有一段好短時間，我覺得其實今次我講愛情，下次我講Sci-Fi科幻，再下一次我講經歷，再下一次講懸疑，其實可以無限創作落去，但呢個念頭好短好快，我覺得咁樣都係有種重複，我不想重複我自己建立嘅模式，所以好快打消咗呢個念頭，直至開始呢個騷，我覺得呢種方式嘅音樂創作，離開到我嘅comfort zone，因為大家有種既定Juno嘅歌，有種感覺知道係邊一類型，但係今次《金榜題名》同大家所幻想既定Juno模式好唔同。」
18年的《The Album》企劃，三張專輯長達三年的完整概念，Juno演繹的是「董折」，今次《金榜題名》內，Juno的新角色叫「細鳳」，「今次呢個角色叫做『細鳳』，佢以前係一個黑道人物，但依家唔係啦，佢依家做咗生意，喺呢個騷發生嘅嗰一晚，呢個黑道裏面發生咗一件事，細鳳收到個電話，佢要去解決今晚發生嘅事情，點解決呢？所以今次方向圍繞住一個黑道堂口所發生嘅事，其實我係想講人與人之間關係，當中唔係講太多黑道，反而係呢班一齊成長嘅人，今日佢哋『金榜題名』，有地位、有包袱喇，我成日都覺得，當你開始有所謂『金榜題名』呢啲元素，你先至有嘢要輸，你相比一個16歲小朋友，冇乜嘢要輸，佢就係比較衝！」
《風林火山》有進度
當年的Juno都好衝。今年3月踏入40歲的Juno，人生早已「金榜題名」，當然不可與當年的金毛小子相提並論。他02年未夠18歲已經出道，怎樣看這廿多年來的轉變？「我覺得觀眾耐性低咗，因為選擇多咗，甚至乎可以話去到一個零耐性嘅年代，代表我播呢條片5秒，我無反應，我就轉下一條！以前我入行同依家都好唔同，嗰時我哋去錄音收歌詞，邊有WhatsApp、邊有email？喺錄音室部fax機，嘟嘟嘟嘟等佢print出嚟，所以好多嘢都唔同咗，只不過我返番去我喜歡嘅工種核心，我喜歡創作。以前曾經覺得，做音樂每首歌長度，其實我俾盡你都係6-7分鐘，6-7分鐘你講嘅嘢又講到幾多？所以我先至想去寫劇本，寫劇本時都冇諗過做導演，但係寫完之後，你個劇本都寫咗出嚟，不如我自己拍埋！很多因緣際會，我覺得如果我冇咁樣做，佢又唔會出現，拍完《殭屍》之後就係《羅生門》，《羅生門》之後就係《風林火山》，《風林火山》之後就係《The Album》， 《The Album》之後就係唔同類型嘅騷，全部都同成長有關係。」
說到17年已經拍完、雲集金城武、古天樂、劉青雲和梁家輝等大卡士的《風林火山》，久未見街，幾乎變成都市傳說，到底上映有期未？Juno說：「宣傳發行部門就唔關我事，我嘅工作其實依家都係佢個後期工作，因為我寫嘅時候，已經知道後期係好沉重，拍完之後我哋進行後期工作，跟住就COVID，變咗好多平時覺得好容易處理到嘅問題，都變成一個問題，例如演員配音已經係一個問題，你要飛演員過嚟配音，COVID期間係好奢侈一件事，亦都好難實行到嘅事，COVID完咗反而叫做正常，大家可以繼續去做後期工作；當然呢幾年亦都出現譬如坂本龍一先生佢離開咗，變咗我就要幫佢去完善埋（配樂），調節所有佢做落嘅嘢，一路都進展緊。其實投資方都有同我傾過，關於咩時候適合上映呢套戲，喺一個創作者角度，我當然想愈快愈好，進度良好嘅！」2024有得睇？「我希望嘅、我希望嘅，都係呢段時間！」
近年Juno身份眾多，歌手演員編劇創作人藝術家麥導演麥老闆，新一年或未來想加多個人夫、爸爸的身份嗎？「冇囉！冇一個新加身份，反而我覺得創作有關，我就有興趣，小朋友就唔曉呀，搞唔掂！可能太多嘢想做，未有一個合適時候。因為我覺得近年工作量，那個龐大唔係話佢有幾密，係每一樣工作其實牽涉緊，以年計嘅execution，所以變咗轉眼間都就嚟四十，諗法又唔同，體魄又唔同，我28歲拍《殭屍》可以拍到咁長時間，同我32歲拍《風林》，已經有唔同分別，但係都還好！」長路漫漫，大把世界。
化妝：Janice Tao
場地：No.5 Studio HK
