劉浩龍自上一次新歌《阿龍理髮》MV中做理髮師後，今次又有新搞作，打扮成日系暴走族，戴上經典飛機頭假髮去測風速，影片中，他狂踩單車，睇吓有無可能吹甩飛機頭，點知飛機頭依然堅挺，反而測風儀被吹到落地。
隨後團隊移師室內繼續挑戰，飛機頭要分別對戰十部電風扇、六個風筒，以三百六十度猛吹，但都依然無法「吹甩」，最後改用直立式吹風機，連他本人都被強勁風力吹到開唔到眼，臉皮被吹到一層層，飛機頭終被吹走。他笑言大家一邊拍一邊笑，自己被吹了幾小時，都吹到眼乾了。
影片來源：HKV@Facebook
