剛滿四十九歲的劉浩龍（師兄），近年甚少看到他的蹤影，直至上月在珠海開騷，唱出多首hit歌如《衝出去》、《火花不等人》與《思覺失調》等，不少網友分享影片到社交平台，加上近日擔任無綫歌唱選秀節目《聲秀》導師，令很多樂迷再次想起，這一位樂壇的滄海遺珠。
劉浩龍為何叫「師兄」？他參加一九九七年《全球華人新秀歌唱大賽》奪金，但七年後才正式加入樂壇，「贏咗新秀之後，我喺TVB做咗幾年主持，甚至冇做娛樂圈工作，出咗去賣錶，好辛苦、好辛苦！終於二OO四年先可以做返歌手，我第一隻派台歌就係《師兄》。」
師兄說，最近擔任《聲秀》導師，看到很多年青人，他們都有一個通病，「我覺得每位學員都好多包袱，我同佢哋講，其實依家你們甚麼都不是，有乜嘢好顧慮呢？難得有一個時間咁長嘅比賽，幾個月入面仲有一班導師，有電視台一大堆人撐你！我記得我參加《新秀》嗰陣唔會有人幫，俾意見或指導，十二個參賽者只有靠自己，初賽後喺TVB排舞，練自己選嘅歌，決賽嗰日上台唱到幾多就真係睇自己，就算唱得唔好，都冇人會教你；我亦冇拜師學藝，練好就上，所以我同佢哋講，唔好諗咁多啦，做好本分先，呢個階段唔需要有壓力。」
享受隔離一個人日子
師兄轉眼入行三十年，問他當年的目標是甚麼？他直言︰「講真，我參加《新秀》並冇話打算入行，我真係只為咗見偶像梅艷芳同許志安。」
你可以話師兄隨遇而安，但做歌手不好勝又怎能登頂呢？雖然歷年他都有不少好歌，但就好像欠缺一個機會，加上跟容祖兒的一段戀情，師兄的成績總被花邊新聞蓋過，後期更轉型演員參演不少電影，師兄說：「加上疫情關係，真係冇乜機會唱歌，用咗啲時間去拍戲，原本一八年在香港麥花臣開騷後，接着一九年廣州，其實之後還有汕尾、中山和另一個地方，但廣州演唱會結束後爆發疫情，很多工作都推了，呢段時間其實幾難熬，隔離咗七次，我記得第一次隔離，係去上海拍晶哥（王晶）的《倚天屠龍記》，人生第一次隔離，隔離整整十四天，同行仲有洪卓立，一到上海機場，馬上開始做各種檢疫手續，仲要完全唔知要被送去邊間酒店，檢疫做完就上巴士，巴士剛開車，前面就有公安遞了張紙條過來俾司機，司機先知道要載我們去邊，感覺好緊張，一到埗就見到……唔係酒店，原來係間賓館！」
隔離的日子，師兄說原來自己都享受一個人的日子，「其實我適應力都幾強，之前都試過喺內地拍戲，應該冇乜問題啩？一開門，嘩！應該有一百零幾呎左右，冇雪櫃、冇Wi-Fi，但竟然我過得幾好，因為好有紀律，每天起牀都會把牀鋪好，之後我就不會再上牀，我就會坐喺枱仔前面睇下電視，每日四點到五點半就係做運動，做完運動就去沖涼，因為五點半就放飯，原來我都幾享受一個人的日子，學會和自己相處真係很重要。」
自律很重要，師兄亦趁這個時候減肥修身，「有段時間超肥，我記得剛結束《臥底巨星》國內宣傳，同Eason（陳奕迅）和李榮浩去好多地方巡迴宣傳，每次做完又忍唔住夜晚去食嘢，我細個開始都肥底，影完演唱會poster，見到自己個樣真係唔得喎，即刻搵教練幫手，我仲要喺IG同大家講，如果你有買票，入場冇腹肌就退錢，真係好大承諾，終於做到啦！」
疫情期間，師兄更去考健身教練牌，「由二一年到二五年，我冇停過操練，先發覺原來自己可以有咁好狀態，每日操一個鐘、跑步半個鐘，三個月完全冇食澱粉質，一滴酒都沒飲過，仲要撞正聖誕新年，所以我其實都幾自律！」
新一代唔夠珍惜啲歌
今年二月，師兄重啟巡迴演唱會，經小肥介紹一位唱歌老師給他，是他人生第一次學唱歌，「開騷前三個月前才開始（學唱歌），摸索期好像太短了，用以前唱歌方法，再加上老師教的新方法，原來三個月真係唔夠，所以在佛山站，唱那三首歌時很緊張，一上台個腦一直在想，死啦，把聲好似變咗？搞到有啲朋友都話，嘩！師兄你好緊張喎，有好多好朋友嚟撐我，真係要多謝蘇永康同梁漢文，佢哋真係專程嚟睇我！我覺得嗰次唱得唔好，連自己啲片都唔敢睇，完騷後蘇永康話，今晚玩得好開心，下星期再約你出來傾下，佢真係同我講，你邊度做得好、邊度可以改進？Edmond（梁漢文）都係專登約我出嚟，我真係好多謝佢哋，仲有另一位新秀師兄Eason，上個月珠海表演前一晚，佢傳信息俾我，佢話買咗個杯俾我，之後佢係寫咗幾句俾我，佢話你要記住投入，你肯投入，觀眾自然會投入埋一份。」
師兄加入樂壇初期，有一段時間被指唱腔似Eason，他說︰「我反而覺得幾有趣，其實出咗兩隻碟都冇人講，啱啱出道梗係好事，有人會提起，又係一個話題。以前講電話，有啲人真係認唔出，但其實好多年冇人再講，依家我把聲好易認，我哋那一代歌手，冇人唔識模仿譚詠麟，大家亦都會模仿許志安和張學友，但依家新一代唔係好想咁做，佢哋好快就想有自己風格，我覺得最大問題係佢哋唔夠珍惜啲歌，以前我哋要買CD，要省吃儉用先買得起，所以特別珍惜那張CD，一首歌一聽就聽兩個星期，依家大家都直接上網聽歌，想聽咩歌都免費，一首歌聽兩日就換，根本沒認真聽別人點唱，甚至連歌詞都未搞清楚，所以很容易被忽略。」
現在的師兄，多了一個老闆身份，「小公司啫，其實都係疫情嗰陣諗出嚟，嗰陣我同Eric Kwok（郭偉亮）一齊開咗個頻道，我要出去搵生意，搵廣告客戶，佢知道我識好多人，好容易同人拉近距離，佢話其實你出去傾生意就最啱啦，佢就做剪片同幕後嘢，有幾次真係跑到數返嚟，舊老闆話不如你自己開間公司，反正你都喺呢個圈咁多年，要識嘅人都識晒，我就同香港『棋人』合作，仲有阿Bob，獨立運作之餘，我又可以自己做自己經理人，仲有一些新企劃，好似幫方力申在內地開騷，不止投資者，我要親力親為，每一場我都有參與，我會提早到現場。我記得第一場我仲著住平時啲衫，觀眾一睇就認到我，係有啲尷尬，因為主角係小方，到第二場我先知，大家都要著黑色crew tee，做製作好唔同，歌手唱完就回酒店，我仲未可以收工，我要去搵導演組開會，幫歌手想講嘅野講出來，嚟緊仲想幫小方去一站澳門，甚至想返香港開。」師兄一於親力親為，力不到不為財！
化妝︰KeiKei Ng
髮型：Jay Yeung@The edge salon academy
