十五屆全運會男子手球比賽落幕，港隊奪歷史性殿軍。我們邀請隊長謝永輝自白，逐場回顧七場賽事，為這十日夢幻旅程畫上完滿句號。
⚡ 文章目錄
11月1日第一場小組賽 香港對安徽 29:34
其實賽前對安徽，我們是好50/50的。因為我們是想贏安徽，因為知道如果贏了，會有好些名次。但亦知道對面小組第二三四名很混亂，意味我們即使拿到小組第二名都未必更好。
我們有憂慮的地方是我們連續打安徽和上海，會不會對我們體能消耗更大？但是我們最後都決定要用力去 打，因為我們覺得要適應一下主場感覺和比賽節奏。另外最緊要是教練覺得我們體能是可以應付到兩場 比賽，所以第一場就好全力咁打，最後輸5分咁，其實都是我們預期之內，沒有說超級失望，因為小組賽階段我們真的最緊要是第二場對上海。
得分球員
3號陳梓朗 4球
10號謝永輝 5球
11號李少聰 3球
24號郭斯鳴 3球
60號劉健斌 1球
65號黃健 2球
72號簡翊暉 3球
73號簡翊文 3球
99號連潤滔 5球
MVP球員 謝永輝
11月2日第二場小組賽 香港對上海 21:20
第二場對上海，我覺得是真的超級緊要，因為這場直接令我們變小組第三名出線，可以避開小組第四名在八強賽對着江蘇隊，是我們整個計劃好重要的一步棋。
對上海其實我們是有信心的，但是我們覺得自己進步了好多，但其實上海隊都進步了好多，這是我們不知道的。所以我們都不是說好擔心，但我們都知道這場比賽一定會好緊好緊，緊到最後就是要靠簡翊文絕殺，我們才鬆一口氣。
得分球員
11號李少聰 1球
24號郭斯鳴 3球
65號黃健 4球
72號簡翊暉 4球
73號簡翊文 4球
99號連潤滔 5球
MVP球員 葉冠英
11月3日第三場小組賽 香港對澳門 24:15
這一場比較特別的是我們通常都是有啲下風的球隊，今次對澳門就變成我們是上風球隊。但是你說我們是否一定打得贏澳門呢？不是，如果我們太輕鬆都是有機會輸的。在未打之前教練Kim是有提醒我們說其實是好難打的比賽，不是實力上面好難打，而是心態上面，因為其實我們是一定要贏這場波，提醒我們一定是要認真去打。
教練用人方面，特登安排一些最主力球員包括黃健、葉冠雄那些休息，不需要冒受傷風險。落場比較多可能副選少少的球員，陳梓朗表現不錯，跟住另外黃俊灝、黃澤橋、陳浩諺表現都不錯。所以就都好輕鬆拿着這個勝仗，亦都在我們保留體力前提之下完成這一個賽事，就更加確認我們是小組第三名。
得分球員
2號黃澤橋 4球
3號陳梓朗 5球
11號李少聰 3球
13號黃俊灝 4球
20號陳浩諺 3球
24號郭斯鳴 4球
99號連潤滔 1球
MVP球員 陳梓朗
11月4日第四場小組賽 香港對北京 19:35
我們真的老實講，由始至終我們是沒想過打的。是呀，我們直頭是當擺六個人在場上就算。當然落到場就會盡力打，但是輸幾多分是完全不理，因為我們不值得去博，因為宏觀去看整個狀況，我們若出力在小組賽和北京隊打，只會自損500。因為我們怎樣都不會夠它打㗎。
你見到我們球員會交換位置打，亦都要用一個好放鬆心態去打啦。冇落場咁多的球員會落得比較多，讓他們都可以好enjoy個賽事。我都有即刻和梁嵐熹、黃俊灝、黃澤橋說「最緊要你們不要覺得，這些比賽你才給我打，你應該覺得企喺個球場度我咪打囉」，更好是譬如站在梁嵐熹角度覺得更好，出面防守越渣，我就越多波守，我覺得直頭是因為這場北京守得好令他有信心在之後三場波都多了落場時間。
得分球員
2號黃澤橋 3球
3號陳梓朗 4球
10號謝永輝 2球
13號黃俊灝 2球
20號陳浩諺 1球
24號郭斯鳴 4球
72號簡翊暉 1球
73號簡翊文 2球
MVP球員 郭斯鳴
11月7日第五場八強賽 香港對廣東 28:26 天時地利造就成功
人生裏最緊要的一場比賽，其實如果這一場輸了，我們就甚麼都不是，因為最後廣東隊是得第八名，是呀，如果我們輸了就是廣東隊，就是得第八，因為下面第五至八名差距很近，我們形容是「鱷魚潭」。但是我們上到去前半，我們擺明是四號種子，我們冇乜所謂，總之已經上了去，我們就搏一搏對安徽贏，跟着對北京甚至乎對江蘇，基本上我們都不用諗，是冇可能。但我們已經前四，整個故仔已經不同了。
八強這場比賽有好多天時地利的幫助，第一見到好多觀眾入場、傳媒和市民開始真的好關注這場比賽。再加上我們香港隊連續打了四日，第五日是休息的，然後第六日是大會的official rest day，再有我們主力球員在澳門和北京那場波是連熱身都沒有，所以基本上他們休息到四日。所以我開波時感受到他們會有啲「餓波」，因為太耐冇打波，個感覺是好好。
但對面廣東隊就不是了，四場小組賽除了江蘇那場，另外三場都是被追打，即使對着小組第五名天津都是被緊逼。所以他們的體能消耗是已經好攰好攰好攰好攰，在比賽開波前，我們已經知道他們一個好緊要的主力22號球員拉傷，攻擊力沒那麼大。而且到開波十五分鐘左右，正選中鋒亦受傷退場，所以在他們有1.5個主力缺陣下，到最後他們都仍然追得平我們。這次很好彩叫順境波，每次都是1分2分3分上落，可能最多有5分，但是都會慢慢被他追到。最後真的最後30秒，到我們有進攻啦，真是傳了給簡翊暉射波啦，真的得返10秒鐘有兩球的差距，我們才知道已經好確定賽果。
連我自己都唔係好相信，就係個鐘倒數到完咗場，我哋領先，咁即係我哋就入四強。
廣東這場，是我諗我人生都未試過，我想嘔啊。
開波嘅時候，是凝住凝住想嘔咁樣，就一路熱身時已經好唔願郁，好似好想搵個位坐低，跟住好想嘔。跟住呢啲感覺就知，嘩真係好緊張咁樣囉。我都係完咗場，我先敢講返出嚟，就話其實我真係超級緊張。比賽當中，我自己亦就做咗啲，我都未試過會做嘅嘢。大部份時間，我就會 瞇埋眼，例如我不用防守時跑回場邊坐低，我不會望隊友防守做甚麼，但係我就會合埋隻眼、調整吓呼吸、數吓個呼吸，同埋有陣時就會諗下一球應該要打啲乜嘢，希望可以超級專注在我自己的進攻方面。
而隊友，我係覺得大家都表現得好好，係呀，真係我好開心。就係咁緊張底下，我覺得大家表現都真係好好，所以我們先贏到。好緊張我都好surprise喎，咁緊張嘅情況下，大家都真係打得好好。
得分球員
3號陳梓朗 2球
10號謝永輝 3球
11號李少聰 7球
24號郭斯鳴 1球
65號黃健 3球
72號簡翊暉 3球
73號簡翊文 3球
99號連潤滔 6球
MVP球員連潤滔
整次全運會，我最深刻的一球是這場對廣東隊，最後我傳給簡翊暉那一球，因為其實嗰一球好關鍵。可能 觀眾角度，為甚麼還要攻？但在場上其實是不可以不攻的，因為球證會即刻吹，我哋即死。那我覺得不如買個機會，這一球特別的位係咩呢？就係，我自己都唔知點解最後埋去進攻，我是左手傳給簡翊暉，咁嗰球左手係發生咩事呀？其實正常我應該畀連潤滔，但是有人想偷連潤滔個波，跟住我就停咗一停，而本身守住簡翊暉嗰個人上咗嚟偷波，所以我就憑感覺我傳咗畀簡翊暉，所以簡翊暉入波那刻，我還在地上，心想着「入呀」咁樣囉。但係如果嗰球，我可能傻仔傳咗畀連潤滔，冇望就咁傳，俾人偷咗個波打、快攻，平手就係咁㗎啦。
11月8日第六場四強賽 香港對安徽 21:24
四強對安徽的比賽強度，比小組賽對安徽更高。對我來說是好吃力，即是要進攻打進去是要用很多力，我自己都覺得攰呀。就最後就要阿斌出一出場，咁就好開心阿斌一出場就入咗一球啦。因為佢開波時，就已經和我說今日個狀態好好。但是唉呀斌第二個進攻就即刻整親，我都即刻調整心態，即刻要繼續落去打，同埋我就知道無論如何都都要頂住，因為阿斌是真的不能再下場了。
最後輸三分，我對這個成績是超級滿意，當然如果最好就梗係贏啦。但是我們自己知安徽實力是超級勁，我們近年和安徽對戰是可以不小心就輸十幾球。但這次只差三球，還要大家入場看是會覺得我們拉鋸緊，好過癮呀，已經是最好。因為我們最怕就是我們就算用盡實力，都無法和安徽隊拉鋸。
葉冠雄上半場便拿紅牌出場當然有影響，但是我覺得是整定的，全國賽時候他都拿好多紅牌，所以他不斷提自己這個比賽不可以攞紅牌，都可以攞到紅牌嚟，是整定的。而且事後我們聊天，他都有說自己本身是一個需要Spotlight的人，但他的崗位防守的功勞其實是會歸於守門員守到波。好多時你見到對方射完球，阿雄瞓在地下就是這個原因。但他在拎完紅牌後，反而鏡頭就長期望住佢，又碌下地、又瀡滑梯，好多嘢帶動觀眾氣氛啊，所有嘅嘢令他感覺鏡頭勁多，所以我覺得都是整定囉。
得分球員
3號陳梓朗 3球
11號李少聰 3球
24號郭斯鳴 4球
60號劉健斌 1球
65號黃健 4球
73號簡翊文 3球
99號連潤滔 3球
MVP球員 李少聰
11月10日第七場銅牌戰 香港對北京 25:33
最後一場對北京其實冇乜特別，我們就知道要好好享受那最後一場。因為其實我們都被北京打亂了部署，照常我們應該在四強對戰北京，我們便留力不打，然後季軍戰和安徽打，我們本身個劇本是如此。因為四強如果安徽對江蘇，他們一定是打死嘅，我們又是用這個策略在翌日對戰疲倦的安徽，那我們就有勝選啦。
北京我們是不會有得贏嘅，完全是實力差距太大啦。但我們在開波那一刻，能夠做到一個感覺是最初半場拉得住北京，已經好勁，三球上落半場，令觀眾睇得好過癮，但其實是我們要超級認真打的成果。
我們一開波個神情已經好開心和好輕鬆，因為我們已經知結果，如果不放開打的話，我們會做不出驚喜。咁最後就超級開心呀，輸咗但得第四名，啲人覺得好好睇喎，好有氣氛喎，咁就係咁樣。
得分球員
2號黃澤橋 2球
3號陳梓朗 3球
10號謝永輝 1球
11號李少聰 1球
12號葉冠雄 1球
13號黃俊灝 1球
24號郭斯鳴 1球
65號黃健 6球
72號簡翊暉 3球
99號連潤滔 6球
MVP球員 黃健
評價自己：真係好好㗎啦 寫個服字畀自己
我覺得自己好好㗎啦，真係打足七場算係咁 ，我真心覺得好好㗎。因為阿斌受傷，本身大家都有傾好，可能他每半場可能有五至十分鐘可以幫到我打嘅，咁我就預八個進攻左右啦，我就會休息，但第一場對安徽時就是少少整親，之後就一路休息休息到四強再打。
咁我本身是和他share同一個位，突然間這樣就對於我的體能需求是大的。我長期都在個球場上，真係直接打晒七場賽事，到最後北京都打晒喎，我覺得真係要寫個「服」字俾自己，因為本身啟德剛剛開放我們踩入場地練波時，其實我都仲腳痛緊嘅，我都仲會 好辛苦 、好痛啊，點解會咁？我都好擔心一有高強度比賽，我第二日係會回復唔切，跟住係好影響我嘅表現，咁但係最後就都冇乜特別啦，我覺得冇乜特別已經係一個好好，沒有突然間有一日係超差喎，又冇話突然間有一日超好喎。
跟住有少少嘢分享俾你聽就是譬如北京那場小組賽，都知那場是教練開會說會換晒啲人去打。我覺得都有個好處是，我在場會給大家一個感覺是大家一齊，即是俾副選覺得一齊，不想他們覺得「好似出醜就我哋出，威就你哋威」咁樣。所以我覺得教練都有放得多我落場，我都和他說不緊要啦，我都是和同大家一齊都是這樣輸。輸幾多分不緊要，但是我們不可以打打吓波，突然間覺得「嘩太丟架啦，我哋認真少少啦」，來影響到自己囉。
最後要好多謝隊友，我本身在隊內角色不是重要得分選手，我只不過是指揮他們去做，去控制球場節奏。多謝他們會聽着我指揮，因為我成日覺得指揮是誰人都做到。差在你聽不聽。
我好多謝他們七場都是會好放心交俾我去控制住個進攻的節奏，哪一 個打，每一球怎樣打。這次全運完結的改變是，我真的變成一個老屎窟了，真的帶着他們好強戰鬥力的一班年輕嘅球員去打。
