MIRROR於1月1日晚的《叱咤頒獎禮》上，隊長楊樂文（Lokman）曾表示2024年MIRROR 12子會為鏡粉做更加多作品。果然講得出做得到，MIRROR在新一年推出最新團歌《Rocketstars》，團歌展現12個人，一條心，像火箭一樣奮力向上。對於MIRROR的成長，Lokman表示：「每個人嘅性格，又或者作品嘅風格都愈嚟愈明顯同成熟，大家喺舞台上拿捏節奏同熟悉感快咗，唔同場館、唔同活動類型，好快手知道發生緊乜嘢事，好快融入其中。」
對於未來的目標，眼前的當然是即將舉行的香港演唱會及World Tour，而成員們都有不同的分享。姜濤說：「對舞台感覺唔同咗，愈嚟愈覺得唔係咁簡單，入行愈耐就知道愈多嘢做得唔夠好，尤其開演唱會，認識到自己嘅不足。演戲比想像中好玩，令我放鬆，釋放喺歌手身份上所承受嘅壓力。嚟緊都係最基本、最基礎嘅嘢要做好，就係歌要唱好，舞要跳好，呢啲係我哋嘅基本功，突破係需要基本功支撐，提醒自己唔好自滿。」
盧瀚霆（Anson Lo）說：「如果唔係喺MIRROR出道，唔會想像到自己係一個演員，以前好驚而家好鍾意演。音樂上一直係跳唱，都冇諗過出慢歌，而家慢歌都有5，6隻，另外就係而家On Show冇咁緊張，只想享受嗰一刻想表達嘅Energy或者風格。嚟緊期待12個可以做舞台劇，未試過，如果可以喺舞台劇，對我哋嚟講，會係一個好大進步。」呂爵安（Edan）說：「經歷5年好多訓練嘅機會，喺舞台上點樣展現自己魅力更加有信心，同時亦慢慢掌握到，更加了解到乜嘢係表演。嚟緊希望每次工作可以參與更加多喺入面，唔係純粹做演員、主持，而係投入其中，例如MV，同導演交流諗法，條橋點行點做，後期剪接等等。」
柳應廷（Jer）：「喺舞台上嘅感覺Firm咗，以前缺少舞台表演經驗，自己信心冇咁強，但表多咗，喺台上面自己會定咗、信心大咗。第6年好想Focus多啲音樂，或者每年開一個音樂會同fans見面，或者出一隻碟俾大家珍藏紀錄一下，希望做到一個大家都肯定自己嘅歌手，建立多啲里程碑。」陳卓賢（Ian）：「五年前冇諗過會跳舞，唱團歌日積月累嘅經驗下，都出咗個人跳唱歌，曲詞編監都有做，涉獵多咗唔同嘅嘢。嚟緊會專注要做嘅嘢，喺不知不覺間就會達到目標。」李駿傑（Jeremy）：「以前好冇信心，但係有11個兄弟喺隔離傍住我去成長，多咗舞台經驗，令自己更加可以喺台上散發自信，心態上好多嘢睇得開咗，從迷惘到享受，自己都開心咗。未來希望可以用自己嘅力量，令到唔識我嘅人，因為我嘅音樂鍾意咗我，鍾意MIRROR，透過我嘅影響力，令到更加多人鍾意MIRROR。」
