Advertisement

【開工大吉77】盧海鵬考3次藝訓班入行 靠四千積蓄捱到畢業

本地
2020.11.04
341

20201104-lhb4

盧海鵬日前接受開電視節目《開工大吉77》接受訪問。鵬哥久未露面,笑言「睇住苑仔大」,喜見對方演技有進步:「我對住啲蠢嘅對手會扯火鬧人,我理得你喊唔喊,總之做戲唔好怕場面,但係女仔我好少鬧嘅,唯有唔出聲囉!對住好朋友我就會講笑嘅,但對住陌生人就唔出聲喇,但係我個樣點樣嬲,大家都係覺得好笑嘅,你話係唔係死火!我有自己主見,啲人可能覺得我固執囉,好唔好相遇就睇環境啦!」

20201104-lhb1

鵬哥就話從小對演戲充滿興趣,街頭睇完粵劇,回家即與好友再演一次:「我唔記得台詞㗎,鍾意咪自己加啲嘢上去,全部自己搞。去到中學就做民工團團長,咁我樣樣都要識啲,到畢業諗住考電影呢行,點知間間都唔請人,最終出嚟做嘢。二十七歲落到嚟香港,諗住考訓練班,點知我超齡!到第二年又去試,又係唔收我,第三年都冇晒心機,偏偏有個朋友話我知,呢年收生收到三十五歲,當時我人工都成八百蚊一個月,但成世人鍾意做戲,都係去考多次,最終同周潤發、吳孟達呢班人做同學。當時簽約得五百蚊一個月,畢業仲要自己整件『單吊西』,我係靠四千蚊積蓄捱到畢業。」

20201104-lhb5

入行後靠積蓄過活,鵬哥笑言曾要行路返工,更會把握每個演出機會:「當年做特約五蚊一集,我咪舉手做囉,因為我個樣惡,專搵呢啲角色比我做,做得嚟又辛苦又難記,我咪試吓做喜劇演員,大家覺得幾好,咁就轉咗型喇。」鵬哥笑指自己「半退休」,坦言有工開會再度復出:「梗係想做啦,但依家都冇嘢做,唯有退休啦!只要體力、能力做得嘅,都想做㗎,只不過唔可以太大動作嘛。我從來冇攞獎夢,後生時就想攞錢,到後期都幾廿歲,攞到個獎證明呢行對我都有肯定。我咩角色都做過晒,由細到大都鍾意做戲,做到個名出嚟,都可以話係得償所願。」

 

黃秋生 許志安
人氣 TRENDING
鄭秀文 許志安 黃心穎 蔡一智 馬國明
https://www.mpweekly.com/entertainment/wp-content/uploads/2020/11/20201104-lhb4-20201104061551-150x150.png