近年於劇集中常演反派的吳岱融，在《牛下女高音》來個大突破，演一個「老婆奴」小男人，本身是潮州人的他自稱大男人主義，但亦有溫柔一面，特別是夫婦鬧意見時，他一定主動哄回太太，「錫對方很重要，我見太太扁嘴，嬲爆爆個樣我會唔開心，我相信好多男人都會這樣，會問她發生什麼事？了解清楚。不過一起那麼久，有樣嘢就肯定的，就是她一直都好錫我，這樣我是知道的，所以我都會好錫太太。當然有時候大家會有口角，無論兩夫妻，兩仔爺都會，但不要不停在對方的缺點去責備，或者發掘對方的缺點出來嘈，咁做就一定會出事，所以你需要不停催眠自己，去想對方的優點，所以就要睇你怎樣想，不想對方不開心，就盡量放大對方的好處，有時候雙方吵架，無論誰對誰錯，我都會主動去哄她，斟杯水給她喝，做一些小細節哄她，可能未必講對唔住，但至少你都要有這份意識，都是同一意思。唉，你氹吓我，我氹吓你就一世，你要令你老婆覺得自己好靚女，受到尊重，她就自然真的會變靚；反過來說，你老婆成日覺得你好靚仔，好有型、好瀟灑，你慢慢就會傾向有型靚仔，所以要欣賞對方，多點讚賞，盡量不好引她內心的魔鬼出現，就相安無事。」
早前，太太鍾淑慧說過「怕凍」，愛妻號吳岱融便於馬來西亞檳城租住四千呎海景豪宅作安樂窩，原來兩人結婚廿五年來，搬家次數接近四十次，內地、新加坡、泰國都住過，他表示享受轉換新環境的感覺，「我本身是新加坡人，四圍住，國內又住過十幾年，只是最近選擇了檳城，因為年紀開始大，都想過一些比較hea的生活，加上與這間屋真的有種緣份，當日入到去睇屋時，簡直笑了出來，萬多元港幣租間四千幾呎屋，好多人都話你兩公婆使唔使住咁大？大佬呀！我兩公婆仲有幾多年過喇？你知不知香港住這種屋一個月要幾十萬呀！俾我歎吓得唔得呀？住十八樓高層，還要四面環海，聽到海浪聲，就讓自己試吓，得唔得先？而且老婆真的怕凍，她真是會凍到喊出嚟嘅人，之前試過國內有民初劇找她演，適逢冬天，戲服又比較單薄，我都叫她不要接，因為我驚她頂唔順。」
年前他在《巨輪Ц》以「鷲哥」形象回歸TVB，成為觀眾眼中的「大惡人」，今次在《牛下女高音》中的Hugo終於做回自己，劇集以中佬追夢為題材，「登六」的他自認是超齡中佬，他笑言：「我覺得自己也出現很多徵狀，講話開始重重複複，體能亦明顯比以前差了，我喜歡踢波，對自己的身體最清楚，加上家中有遺傳的血管疾病，所以照顧身體來得重要，現在要注意三高，定期做身體檢查。」
他說最開心可以與劇中幾位中佬合作，想不到一拍即合，「劇中有好多中佬，大家同聲同氣，起初都擔心會有危險，因為大家都已經獨當一面，如果傾唔埋就好大鑊，幸好大家好啱傾，更會互相幫助，我永遠相信一套戲的團隊，肯互相幫助都不會差。成套劇最難忘的，當然是每次拍唱歌，因為好多技巧性要去顧及，特別是拍子上，可能會唔齊，又要記歌詞，還要有些意大利歌詞，邊度識呀？幸好蔣志光寫了大字報給我們。」