新婚的馬國明，婚後火速投入工作，率領胡鴻鈞（Hubert）、吳業坤（坤哥）、孔德賢、鄭衍峰、丁子朗及黃庭鋒，一行七人一日內先後到茂明及佛山活動搵真銀。今次七子拍住上搵錢，所到之處充滿笑聲，最搞笑是大會安排剛新婚的馬明參觀「二人世界」示範單位時，馬明即場指坤哥都是今年結婚，隨即被坤哥反擊搶答：「係呀我早佢少少，講結婚我先係前輩！」令大家爆笑。
至於因劇集《降魔的》結緣成為好兄弟的馬明同Hubert，苦等多年終於等到二人齊齊商演機會，Hubert說：「石敢當同小馬一直好受觀眾歡迎，但因疫情停擺所有商演活動，等咗三年終於機會到。」
另外為挑戰自己參與了《亞洲超星團》的丁子朗，在茂明台上唱出《給十年後的我》時，演出明顯有信心及穩定好多，而因劇集《新聞女王》人氣急升的孔德賢，第一次一日跑兩場商演感覺超興奮，他說：「好開心第一次可以一日走兩場商演，行程係好緊密，但又令我覺得好開心。今年兩套電視劇令自己多人識咗，但冇諗過係內地都聽到粉絲叫自己角色名，覺得受寵若驚，希望可以愈做愈好，令更多人認識我。」