中秋節將至，正密鑼緊鼓為下月（10月）首個個人演唱會加緊排練的炎明熹（Gigi），為了行善，早前抽空與8位粉絲一起到餅房整月餅義賣，收益扣除開支後，全數撥捐「沙律貓狗之家」，為流浪動物機構籌款。
今次活動，由Gigi的歌迷會一手一腳籌劃，並慶祝Gigi出道兩周年，將於今個周六日（16、17）舉行慈善義賣嘉年華。當日除了會義賣Gigi有份整的月餅，還有多款限量精品，包括由Gigi親手繪畫的手繪布袋、演唱會簽名海報等，希望為流浪動物機構籌得更多善款。
第一次整月餅，Gigi坦言製作過程有點戰戰兢兢，她說：「因為第一次，所以有啲手忙腳亂，加上每個步驟唔可以急、亦唔可以錯，需要好大嘅耐性同記性，好在現場有老師一步一步教我同fans應該點做。」今次義賣共100盒，並有不同味道選擇，當中Gigi特別鍾意柚子味。
由搓餡、做皮、倒模、以至掃蛋醬入焗爐，Gigi都有參與，歌迷會更特別訂製了印有模仿Gigi樣貌設計的公仔「Gi囡」圍裙給她，當穿起圍裙時也忍不住說：「我好似大廚！」
另外，當日歌迷會安排了一部爆谷機，恭賀Gigi兩場演唱會爆賣。她說：「嗰日好多第一次，第一次做月餅，第一次整爆谷俾自己同fans一齊食，但我唔敢食太多，因為要好好保護把聲，不過整爆谷好好玩，睇住佢爆開，心情原來會好興奮。」
Gigi當日亦會現身嘉年華幫手義賣。「其實最辛苦係歌迷會，花咗好多時間搞今次活動，當日會有攤位遊戲，又有打卡佈置，仲有個2米高嘅Gi囡公仔俾fans影相，到時我會落去幫手，因為中秋節正日（29日）我應該要閉關準備演唱會，嗰日可以同fans提早慶祝中秋節。」
