洪嘉豪今年首支派台歌《黑玻璃》，早前推出單曲封面，已令粉絲覺得非常有《頭文字D》感覺，原來MV去到漫畫中的賽道碓冰拍攝，讓愛車的嘉豪可以「自肥」大過車癮！嘉豪說：「今次我新歌MV就係去咗日本揸車，亦都係我呢5年嘅歌手生涯第一次出埠拍MV！因為歌曲都係講車嘅，今次MV決定揸車，亦都想俾人知道我鍾意揸車呢一面。」對車也頗有研究的嘉豪，對日本車情有獨鍾，對車款與MV意境配合度也很有想法，早前考了棍波車牌的他，甫坐上自己dream car表現興奮，每一幕揸車場景都親身上陣，更豪言一定要買這部車。
今次MV甜度十足，一反嘉豪過往M的慘情情節，而他也大讚女主角：「女主角Ocean本身係中文教師，同時參與演員工作，其實我好多謝佢，因為好多時我做一啲甜蜜鏡頭我會尷尬，反而係佢lead住我，今次合作非常順利。」問到是否史上最親密一次？他說：「其實可以咁講，亦都唔可以咁講，因為之前《逆時車站》個MV都有啲頭貼頭、比較近少少鏡頭，今次可能再多咗啲擁抱身體接觸。」
新歌在車界惹起迴響，除得到不少專頁分享，竟然得到奧運金牌選手張家朗分享：「引起迴響可能係因為今次我揀嘅呢架車，係一架識車之人都會respect嘅一架車，我都見到張家朗哥哥分享，以我所知佢都有玩車，可能係因為咁而得到佢repost啦，我都有同佢say咗個thank you，大家都叫做因為車而認識咗，希望有機會可以認識佢。（會否做車手？）都好㗎，但做車手係需要金錢嘅活動，我都係做返普通街車車手。」嘉豪今年4月13至14日，將首次登陸紅館舉行演唱會，問到是否已開始準備閉關？嘉豪似乎已調節好心態：「一直都有鍛練，又未至於需要閉關，唔想俾咁大壓力自己，都會盡力做但未必會閉關，每日都會做下訓練，準備好自己！」