洪嘉豪昨晚（13日）首踏紅館舉行《Kaho Live 2024》演唱會，成龍、鄭裕玲、張敬軒及Bob林盛斌等圈中好友均有送花藍祝賀，並為他打氣，魏浚笙、Lolly Talk、強尼、練美娟、鄺潔楹、陳穎欣、鍾雪瑩及陳詠謙等等則前來捧場。
Kaho在開場時以一身型格西裝look現身，一口氣唱出《主角光環》、《Truth or Ture》等歌曲，唱出《Truth or Dare》時更跳起舞來，惹來全場fans尖叫。接着，Kaho換了一套青春迫人的歌衫，唱出新專輯歌曲《明星示範生》，再與一班Dancer勁歌熱舞，又拿着電話近距離與觀眾影相及自拍，令歌迷興奮到飛起。Kaho在這部分穿上露腰衛衣，令腹肌若隱若現，令粉絲陷入瘋狂！「除衫、除衫」之聲響徹紅館。他跳唱完畢，笑言：「大家想睇到都睇到啦！」他又指到目前的腰圍，不只是「踎低起身見頭暈」，就連睡覺起來喝水也會感到暈眩，對於歌迷無間斷大叫「除衫」，他便用阿媽做擋箭牌，「講真呀，我媽今晚喺度呀，除埋佢唔認我㗎啦，入行嗰陣我媽有叫我做啲唔好除晒衫嗰啲嘢呀，哈哈‥‥‥」
昨晚他請來邱彥筒（Marf）擔任嘉賓，與他合唱《仍有心跳脈搏》；兩人合唱後，Marf 脫去外套跳唱《I’m Marf-elous》，活力十足，亦帶動不少現場熱烈氣氛。Kaho說：「我哋由拍劇互相認識，我飾演佢哥哥，我本身未見過佢，但係都覺得佢好cool 。原來認識後，佢係我認識中，最妹豬嘅一個女仔，我都幾錫佢。」
Kaho又唱出新歌《黑玻璃》，並實現了他的夢想，舞台上升出他拍MV的心儀戰車，伴他一起演繹這首歌。他說：「有啲唔開心囉，有人係TG group 影咗我㗎車出嚟，我以為神秘一點，一升出來大家覺得超勁嘛‥‥‥」歌迷便安慰他：「好勁，一樣咁勁！」
Kaho在台上跟山頂的觀眾打招呼，「你望住我好似一隻蟻咁細，我都曾經係個度睇過騷，我今日開騷前都有行到上去，好快就行完。但係我喺上面行到依家台上，係用咗好耐，anyway，我會繼續做好自己。」隨即獲得不少掌聲，他又坦言：「我唔知點解今晚唱歌，感覺似係屋企唱歌咁，唔知點形容俾你哋聽。」唱出《我懂》前，Kaho又指很多自己的Hit歌也不是由其創作，曾令他沒有信心再寫歌，不過他不會放棄，像演唱會名稱——《洪嘉豪Kaho Live 2024 》，「你哋係咪以為，點解咁Hea改名？我其實係刻意改，我想大家感受到，香港有好多嘉豪，好似我一樣，樣貌普通，生活平凡，但係人唔應該因為平凡就覺得自己咩都做唔到，我希望可以勉勵大家，唔好怕失敗，做咗先，試咗先，好似咁我，衰咗再認輸！」
到了Encore環節，Kaho唱出最後一首歌《洗面》前，自言有很多時也做得不好，甚至做錯了，又會向阿媽發脾氣，但希望大家聽完這首歌後，可以將以往所做的錯事及對不住的人，也可以在洗個面之後重新做人。
Kaho在演唱會後接受訪問，表示第一晚給予自己70、80分，第二場希望做得更好。他被問到現時腰圍吋數，直言：「27吋！今次真係唔係刻意減肥，但可能因有壓力所以食少咗，胃口細咗，今日下晝諗住食多少少，等上台有多啲能量，但唔知點解一食多咗就想嘔。」他又笑言目前有4、5塊腹肌，「公司覺得我今次點都要露少少嘛，咁做到啦我，露都要露得有美感，阿媽應該會為我感到驕傲。」對於唱到《只要你不尷尬》時頗為感觸，感覺似強忍淚水，Kaho承認當時看到舞蹈員穿着自己很多舊衫，化身一個個以前的他，讓他回想很多事情，所以有一點感動和感觸，不過今次他因為不想落淚而影響演出，所以已把《主角光環》調到一開場唱，免得自己又再忍不到流淚。
