李靜儀（Heidi）相隔4年再獲邀到巴黎和米蘭時裝周，過往是時裝周「常客」的她，坦言今次出發前既期待又緊張。她笑說︰「因為實在太耐冇去，特別着緊，而且要著的衫都比較貼身，或者比較性感，出發前半個月都不斷去做gym操fit，希望以最佳狀態示人。」
提到一口氣去了米蘭和巴黎的時裝周，行程相當緊密，Heidi甫抵埗便病倒，不過無損她睇騷心情。她表示︰「去到米蘭開始病，有驚無險食住藥控制到，唔算超級嚴重，亦冇影響工作。」不過今次的旅程Heidi亦有遺憾，因為發生了一些意外，趕不上其中一個騷。
除了大塞車外，Heidi於巴黎更差點出意外。她說︰「今次去巴黎俾咗自己一個重要任務，要喺巴黎踩單車，不過租完先知道係架電動單車，比想像快好多，喺單車徑踩時差啲發生意外，當時失平衡，而且又有好多車，幸好身體閃避到先冇事。」
Heidi又趁空檔到意大利世界文化遺產之一的五漁村靚景放假充電，並興奮謂可以看到一個非常漂亮的日落。Shopping方面，Heidi強調「只係買咗少少」，她笑說︰「去時裝周都會獎勵自己，但唔係好放肆，好理性咁買咗啲衫褲鞋襪。」
至於完成時裝周後獨自到英國旅行，Heidi直言是「成就解鎖」︰「估唔到自己一個人可以去咁遠地方旅行，因為我係一個比較倚賴人嘅女仔，同埋比較膽少，好似去歐洲都會驚俾人搶劫，或者會有咩危險，好開心自己可以獨立咁在倫敦生存幾日。」
