張繼聰44歲收冧爆驚喜　囡囡自學彈琴送生日歌

張繼聰今日（11日）44歲生日，老婆謝安琪（Kay）在社交網上載6歲囡囡張靖（Kakaball）自彈自唱生日歌送給爸爸的片段。Kay先祝老公生日快樂，每一日都快樂，然後表示：「唔識彈琴嘅Kakaball，想送個驚喜俾爸爸，自己睇片自學彈生日歌，送俾爸爸做生日禮物。練習好之後，仲特登叫我幫佢拍片，估唔到個傻豬仔，第一take就成功自彈自唱添（佢自己都驚訝）！大家鼓勵下呢位窩心嘅小朋友吖，陪佢一齊祝Daddy生日快樂好嗎」。

網民紛紛大讚Kakaball好冧豬，一定冧死爸爸，又讚她「藝術天份咁高，手指仔又咁長」、「自彈自唱好叻」、「優良遺傳父母的音樂天份」。