區瑞強（Albert）前日（24日）於伊利沙伯體育館舉行首場《區瑞強開心樂悠悠演唱會2024》，Albert邀請來小兒子區昕進，以及《中年好聲音》第一季的吳大強（Bill哥哥）擔任表演嘉賓，送上一連串中英文經典金曲。不少圈中好友如樂易玲、龔嘉欣、譚凱琪、譚玉瑛、李有毅、陳圖安、新人范明熙等亦現身支持。
Albert表示：「今次演唱會以半慈善形式舉行，推出優惠票價，希望讓更多喜歡音樂，但經濟上有困難嘅朋友可以入場一齊享受，亦非常感謝Bill哥哥答應做賓嘉，我一直都好欣賞佢，尤其係唱英文歌非常了得，而且原來佢玩樂器都有一手，今次仲身穿蘇格蘭裙吹口琴，又喺台上即時換衫，令演唱會增添唔少色彩。」Bill哥哥則興奮地說：「對於今次演唱會我都期待已久，今次玩啲新意思，台上換衫可以話係破天荒，剛剛我其實專登換慢啲，考下Albert口才同急才，果然難佢唔到！」
Albert於台上有感而發，透露大兒子成為父親：「唱到《漁火閃閃》一曲時，回想起大仔兩歲時曾經錄過呢首歌，嗰時我初為人父，到依家大仔都成為人父，感覺好奇妙。我平時好少講自己家庭事，不過今次特別感觸，亦好想將呢份喜悅帶俾大家。」
Albert小兒子區昕進繼早前於電視慈善騷後，再次與吳大強合作，表示已建立默契，會全力以赴為觀眾送上好歌。演唱會特設現場點唱環節，成功點唱的觀眾更可獲得Albert的親筆簽名絕版黑膠唱片，所以觀眾在這個環節中的反應特別熱烈。
Albert世侄女樂壇新人范明熙（阿V）亦到場支持，表示：「Uncle Albert同Uncle Bill兩位都係好好嘅前輩歌手，經常教導我唱歌同口才，而且歌唱及舞台經驗都非常豐富，所以今次特意送花，支持番佢地之餘，希望可以向兩位偷師。」Albert亦對阿V讚口不絕：「呢個世姪女唱歌非常好聽，而且謙虛受教，希望大家多多支持佢，俾多啲機會新人。」阿V亦透露接下來將推出首張個人單曲《隨便放閃》，正積極進行籌備工作，希望大家多多期待。
Albert今年11月將再次舉行演唱會，希望屆時可以再次邀請Bill哥哥擔任嘉賓。Bill哥哥則表示歡迎及感謝，希望二人能再次「強強聯手」。
