洪永城（Tony）2021年與梁諾妍（Inez）誕下女兒Amber，去年12月，Tony趁着40歲牛一，於社交網宣布太太再懷孕。今日兩夫妻特別舉行「性別揭曉派對」，一家三口齊齊穿上粉紅色和粉藍色相間的衣服，現場擺放了一對巨形男寶寶和女寶寶氣球做裝飾，並讓到場的好友競猜BB性別，Inez指大部分人均猜她懷着男胎 ，最後二人宣布將添一名小公主！
Inez在IG寫道：「一直都好想搞一個Gender Reveal Party，最開心係有人陪我玩。多謝洪爸爸，竟然都可以等到我7個月先知2.0 係仔定女。利申：我哋真係唔知性別的，當然我哋嘅心態仔女都好無所謂，健康係最緊要，而正當大部分人（連我同洪爸爸都係憑感覺地）估佢係仔⋯上天送多個小公主俾我哋，一知道Baby girl 喺場battle 度贏咗，真係激動到喊出嚟。」
她又感謝好友兼囡囡的契媽黎紀君（Christy ），「好多謝你由我第3個月護士完抽血text 你2.0個性別，你隱瞞咗4個月，再幫我哋搞咗呢個Gender Reveal Party，仲要一手包辦個勁好食嘅蛋糕、cupcakes、cookies，真，係個個食完都話超好食！我們好愛你啊契契。」另外又感謝區永權做MC，炒熱現場氣氛。Inez最後表示：「Sir Face 2.0 妹妹好快見大家啦，其實諗起屋企有3個洪永城都真係幾好笑！」
