洪永城（Tony）與梁諾妍（Inez）的細女昨日已出生，他們今日（23日）各自在社交平台分享喜訊，Inez表示：我們的sir face 2.0妹妹 Beryl，喺荃灣港安醫院出世了重7磅2，51cm tall，SIR NOSE。多謝你選擇我哋做你父母，我會係你和家姐最強嘅後盾。」她透露由於第一胎食全餐關係，為了避免跟上次一樣難生產，所以今次選擇開刀，「而由於第一胎我係震痛到瘟瘟沌沌，今次嘅剖腹產對我嚟講好似第一次體驗咁，當聽到妹妹出世嘅喊聲，我同洪爸爸都忍唔住，捉住對方隻手一齊感動到喊出嚟，呢個感覺太奇妙了。見到你足晒磅健健康康，成隻粉紅肉肉豬仔咁，媽媽倍感安慰。」
Tony則代表Beryl向大家自我介紹：「大家好，千祈唔好誤會，我唔係Amber呀，我叫Beryl ，或者將來叫我洪啤啤都得，我21號喺荃灣港安出世，啱啱趕得切成為一個白羊女。頭先我都聽到啲姐姐話叫我sir face 2.0 ，我其實有啲唔開心，因為我想似我靚靚嘅媽咪多啲，我一定要做mum face 。我知道我喺媽媽肚入邊嘅時候跳跳紮紮，令到媽咪瞓得唔好，同埋原來我自己都幾有肉地頂住媽媽個胃，大個咗我一定會好好照顧媽咪同佢個胃。我好高興嚟到呢個家庭，我有個好為食嘅大家姐Molly ，又有一個非常好動嘅二家姐，所以我決定傳承佢兩個嘅優點成為一個又為食又好動嘅三妹，同埋我偷聽到爸爸話一定會帶我周遊列國去旅行喎，好嘢！」他又感謝一眾醫生護士令到老婆平安生產，並承諾令Beryl成為一個健康寶寶。
