杜德偉的可愛囝囝AJ（Alex Junior）近日轉新形像，剪了一個得意的「和尚頭」，未夠兩歲已經懂得揸住枝「K歌神器」同爸爸夾歌，兩父子合唱的短片擺上網後個個讚好，輪到爸爸唱時囝囝仲識得遞咪，好醒目，負責拍片的媽咪Ice透露，呢枝「神器」是囝囝最愛的玩具，平時看到爸爸在電視上揸咪唱歌，他也喜歡揸住「神器」模仿爸爸咿咿呀呀唱歌，拍片那天兩父子飯後一齊玩，情景溫馨又搞笑。
AJ的和尚Look大受好評，但原來杜德偉曾經因為剪頭髮激嬲囝囝，杜太話﹕「天氣熱，囝囝頭髮長好辛苦，之前Alex帶他去髮型屋剪頭髮，怕他郁來郁去整傷，所以全程抱住佢，唔想佢郁，都用咗力夾實，剪完囝囝好唔開心，覺得爸爸冇保護佢，仲夾埋外人整佢，足足兩日唔睬爸爸，氹咗一輪先冇事。」
頭髮長的問題最終由公公出馬，趁他睡覺的時候操刀，好順利將頭髮剪短，想不到囝囝起身一照鏡，發現頭髮不見了，唔同咗樣，摸一摸又拮手即刻喊咗出來，「當時的場面幾搞笑，公公、婆婆、姨姨個個親友夾埋，一見到佢就嘩一聲，說：『BB你個頭咁靚嘅！』囝囝見到人人讚好，開心番，依家照鏡摸住個頭不知幾開心。」
圖片來源：杜德偉@Facebook
影片來源：杜德偉@Facebook