李璨琛育有兩名分別6歲和1歲的女兒李元元（Lucy）及李斐斐（Sucy），多得太太梁志瑩（Sophia）經常在社交網分享囡囡的生活日常，甚得網民喜愛。昨日深夜Sophia在ig限時動態帖文，透露兩個女兒相繼生病：「最近心好累，家姊之前腺病毒搞咗成個幾禮拜，好返冇耐，又突然間發高燒流鼻涕，今日又咳到肺癆咁，然後阿妹琴日又突然間發高燒，跟住今日又發現佢有好多眼膠，然後我發現佢應該都係中咗腺病毒，我今日就係不停幫阿妹抹眼屎搽精油叫家姊食中藥，無限輪迴。#小朋友病真係慘過自己病 #徘徊在客服梁與護士梁之間」。
今日Sophia再貼上Lucy大字型攤睡牀上的病容照，留言：「一睇就知佢琴日經歷咗好多 #好一個咳到懷疑人生嘅樣 #媽媽最近都真係headintheclouds」。網民都戥Lucy陰公大嗌心痛，紛紛祝兩姊妹早日康復，但亦有網民話：「媽媽影到咁，我真係好難唔笑」。
近日香港天氣不穩定，很多小朋友都感染了腺病毒，之前就有吳浩康的1歲半兒子、陳柏宇1歲細女都感染了，令父母都很擔心和心痛。據衛生署健康資訊，腺病毒是一組感染人類黏膜的病毒。因應不同的血清類型，病毒可引致呼吸系統症狀，亦可導致腹瀉、眼睛發炎及紅疹。腺病毒感染全年皆會發生。
病徵方面，不同血清類型的腺病毒可引致不同的病徵，例如咳嗽、流鼻水、喉嚨痛及發燒等呼吸道感染病徵；腹痛及腹瀉等腸道感染病徵；及眼睛發炎（紅眼症）。
有關傳播途徑，腺病毒主要透過飛沫（如咳嗽或打噴嚏）、直接接觸患者的口鼻分泌物（例如與患者握手，或接觸受污染的物件表面），或進食受污染的食物或食水傳播；及可於學校及醫院等院舍內引致急性呼吸道及眼睛感染的爆發。
潛伏期一般為2至14天。此病症並無特別的抗病毒療法，患者一般依靠輔助性治療及補充水分。
