肥嘟嘟一向是「細細粒」陳嘉佳的標記，體重高峰時期曾直迫300磅，去年4月細細粒宣布減肥，5個月內成功搣甩110磅。近日由內地回港，細細粒為本刊首度穿上泳裝示人，體重165磅、身形細了幾個碼，距離終極目標130磅好接近！加油呀，細細粒！
問細細粒的終極目標是多少磅？她很堅決說︰「60公斤！(132磅)，仲有三十幾磅，一定要成功！」
向目標進發，達標之後，細細粒最想的，是行入內衣店，「我肥，並唔係由六、七歲開始肥，真係由細肥到大，我睇返六年班嗰本紀念冊，唔知點解要寫埋磅數，我嗰陣已經165磅，所以我細個啲衣服已經買唔到，係我媽咪用衣車幫我車出嚟；仲有一個秘密，我係從來未去過內衣店，未度過自己的size，好多女仔都知道自己係乜cup數，但我係唔知嘅，由細到大，我都係穿運動型內衣就算，我依家都唔會買住，因為我仲減緊，到真正減完之後，我就會去買。」
肥嘟嘟一向是細細粒的標誌，減肥之後，會否擔心失去獨特標誌？「我出道都十年，拍《老表》時是14年，我覺得大家會為我開心，雖然，大家以前認定了細細粒係肥嘟嘟好得意，咁肥都可以做到演員。其實之後愈來愈多人話我唔健康，今次減肥除了因為健康，我唔想早死過阿媽，生死我唔係好怕，但係唔好早死過佢！得我哋兩個，我哋又冇親戚、冇兄弟姊妹，唔想得媽咪一個人，好陰功。」
細細粒亦因為這次減肥大計，才發現自己的毅力，「毅力係最難，好多人都是三分鐘熱度，我都擔心，但原來有毅力，真係可以成功，包括我開始做直播的時候，講真，依家好多人都想做直播，但唔係個個都敢行出呢一步，因為唔係一定得。當日決心去做直播，都係用呢股毅力，頭四個月冇人識㗎，我一個人喺杭州匿埋喊，好失敗，冇扶持、冇流量，第四次開播都仲係得六十幾個人睇，賣得三千蚊，即係我可能只賺三十蚊！原來要做好多分析，當日祖藍一開播就有十萬人，我諗自己再差都有一、兩千人啩，一路望住個數都仲係六十人，心理質素好影響。我有問過祖藍，佢話幫唔到，要靠自己，原來做直播唔可以當成一場商演，要做好多research，唔係人哋俾乜你賣就賣，或者有流量的明星可以搵到快錢，長久冇可能，講到尾又係毅力！」問細細粒最好的成績，可以做到多少？「接近一千萬(業續)，健康產品，依家大家都講究健康。」
搵到錢，細細粒亦開始買「磚頭」保值，「我將人生搵到的第一桶金來買樓，去年買了兩層樓，一層大灣區、一層香港送俾阿媽住，希望今年再買多層。媽咪辛苦了七十年，從來未有過屬於自己的一棟私樓，我都希望用自己能力送俾佢。依家淨係想搵多啲錢，因為我覺得自己呢一世，應該都係單身㗎喇，我都39歲了！真心，以前覺得冇拖拍，係因為我肥，我依家都叫做減咗，但仲係連一個普通男性朋友都識唔到，身邊唔係95（年）就00（年）！（仲係A0？）係呀，冇咪冇囉！」
母胎單身，連細細粒身邊好友都開始替她着緊。林盛斌（Bob）是圈中出名「金牌媒人」，曾幫張秀文、朱慧敏等找到好歸宿，今次連金牌媒人都出手，「祖藍又好、阿Bob又好，我都有話有男仔唔該介紹下，我啱啱喺佛山做完阿Bob演唱會，後台見到面，佢話我成日唔喺香港好難搞，唔係冇幫我搵，但真係冇乜反應，咁我惟有focus事業囉，我又過咗好想結婚階段，39歲人，突然好想發展事業，想從商，希望有日退休之後，可以喺唔同地方開連鎖營養會所，做健康教育，只要唔好蝕錢，幫到有需要的人就好。」
已經久未拍劇的細細粒，對上一次拍劇，已經是前年的《痞子殿下》，原來她已約滿離開了無綫，「同拍拖一樣，冇人搵，哈哈！我已經離開了TVB，好歡迎各方面搵我拍劇，我仲有戲癮，早知今次真係的起心肝減肥，我就拍套真人版《瘦身男女》，肥同瘦都自己演，不過錯過了，我唔會因為咁令自己肥返100磅㗎！」
場地︰露營生活@camplife_hk
