MIRROR演唱會意外受重創的舞蹈員李啟言（阿Mo）的父親李盛林牧師與家人，及阿Mo女友蘇芷晴（So Ching），日前跟當日演唱會一眾舞者會面後，多位舞者昨日都有在社交網發文抒發感受。當日同告受傷的舞員張梓峯（阿峯）雖已出院休養，但他傷及盆骨和腰部，情況較反覆，原來日前他也有跟李父他們見面。
阿峯今天在社交網貼上跟李盛林牧師的合照，留言：「災難發生咗差唔多2個月…我同我哋咁多個人仲等緊一個真相…」。
阿峯謂當見到Mo爸爸一刻，內心很複雜：「我覺得自己因為當時無能力再救Mo多一步而充滿內疚，同時望住佢哋屋企人同蘇晴心力交瘁嘅樣而覺得心痛…我好想同佢講一聲『對唔住，我當時救唔到阿Mo…』」。
阿峯表示每當他起身、吃飯及看醫生，好像一個正常人的時候，都會突然想起仍在醫院的阿Mo：「然之後當晚所有嘅場景，就會喺我眼前面重新再發生一次，我每一次都要孭（瞇）埋雙眼揼（耷）低頭，調整自己嘅呼吸，先至可以令到依個畫面暫時停低。」
阿峯反問自己是否真的可以當沒事發生並如常生活：「最近喺我書包發現阿Mo個演唱會pass…我見到嗰一刻個心好難受，感覺好空洞，好似隔咗好耐咁，但係一瞇埋眼又好似琴日發生嘅事。」
阿峯續謂：「有時見到熟人問候我，我都會覺得變成一種無形嘅壓力，因為每次有人一問候我，我就諗起出事當晚嘅所有場面……最近，每一日嘅治療，身體嘅痛楚令我睡眠質素同精神都好差，處理日常生活嘅嘢都未處理到，但係我會繼續努力，好快會親身交代返我自己嘅情況…之前大家嘅關心未能一一回覆交代…希望大家體諒，之後一步我會慢慢同大家講。Mo，你要振作，我哋都好掛住你，好想陪住你！」
