曾做獨立歌手三年，2022年轉簽華納唱片，去年憑一首《至少做一件離譜的事》嶄露頭角的31歲創作女歌Kiri T（謝曉盈），為推出首張廣東專輯《a kiridiculous distance》接受商台的《星光背後》訪問。Kiri T十四歲時已有機會為容祖兒創作《兩面》一曲，及後於美國讀伯克利音樂學院（Berklee College of Music）期間，亦曾因網上發表《Twenty Something》一曲獲美國公司斟洽簽約。可是，Kiri T選擇學成回港走上獨立歌手路，先後自資推出兩張英文專輯。Kiri T又剖白當獨立歌手的辛酸，轉簽大公司的因由外，亦坦承父母曾為她當了三年月光族而擔心，「嗰時真係好離譜，月月清，搵到錢都用晒嚟錄音拍MV。」
英國高中修古典音樂，大學再赴波士頓伯克利音樂學院主修電子音樂設計的Kiri T坦言感恩成長於一個父母愛錫，沒經濟負擔的家庭。她自揭迷上音樂，竟然源自小時候母親帶她學芭蕾舞，「媽咪好想我跳芭蕾舞，但我反而畀跳舞嘅琴聲吸引，之後變咗學琴，再求媽咪買一部都幾貴、可以有作曲軟件嘅電腦畀我。」Kiri T形容自己對一件事沉迷猶如「Addicted」上癮，14歲作給容祖兒《兩面》一曲，就是她於睡房不眠不休的作品，「當年我好鍾意人山人海同何韻詩，主動Send Demo畀佢哋，無諗過阿詩會覆我，係好開心，就好似中獎咁！」由於《兩面》之後的作品再沒被選上，令Kiri T自感不足轉赴英美進修音樂。
Kiri T於2019年美國學成回港後三年，曾為不少歌手如何韻詩、許廷鏗、吳雨霏等作曲，亦自資推出兩張全英語專輯，她坦言當時最大收入來源是從事廣告音效工作，「以前鍾意做幕後，都有做演唱會樂手同和音，出碟其實無收入。一開頭OK，嗰兩隻碟係Enjoy嘅，因為我有份正職，當時做好多廣告Jingle，覺得好Secure，啲歌鍾意幾時出都得，無諗幾成功，好自由無壓力。但當我玩咗三年，就開始諗係咪要行到做一個專業歌手，所以先計劃簽大公司。」
2022年Kiri T簽華納唱片走進主流樂壇，她指就連不少朋友也驚訝，但父母及家姊反而放下擔心，「因為我每次做一隻碟都好搏，想做到最好，心情就好易忟，佢哋會覺得我點解要咁辛苦，做幕後咪幾穩陣幾好囉，同父母講都會講到喊，甚至我啲樂手朋友都話我倒錢咁出碟搞騷。當時係無得儲錢，一出糧就倒啲錢去做專輯，真係一滴積蓄都無，啲朋友同爹哋媽咪都會擔心。但當時我會話：『啱啱好呀！無得儲咪無囉！』嗰時真係好離譜，月月清，搵到錢都用晒嚟錄音拍MV。」
Kiri T感恩有個幸福家庭，容許她放任自由追夢，「係無得畀家用，佢哋亦無追我家用，爹哋媽咪好好，我真係好好彩，無家庭經濟負擔，佢哋亦無迫我轉行，但有時都會尷尬，所以後嚟簽大公司其中一個原因，就係唔想爹哋媽咪擔心我繼續做一個歌手。」所以Kiri T做歌手後父母放心她的一刻，不是她首次踏上頒獎台獲獎，「我入咗華納之後，佢哋就已經放心咗，覺得我唔係倒緊自己啲錢出嚟，就已經係叻咗。當然叱咤攞獎嗰晚，全家都好開心，好好笑，成晚喺個Group度叫我唔好喊，話我個妝溶晒啦。」
