現正忙於宣傳6月紅館個唱的陳曉東，近日接受商台《星光背後》專訪，除了分享出道30年來面對事業起伏的心路歷程，以及今年兩首新歌的風格突破外，更首度公開與台灣太太王妤嫻結婚逾12年的相處之道——「盡量」哲學。
陳曉東接受梁泰來主持的《星光背後》訪問
陳曉東坦言，儘管已為人夫、人父，但自13歲經歷父母離異後，至今仍然不完全相信婚姻制度。他坦言：「我而家都唔信（婚姻），不過盡量咋。」他回憶婚前曾對太太坦白：「大家都會幻想永恆，但我好實際，因為人同人相處唔可以勉強。結婚後我會盡量做，睇吓我適唔適合婚姻。」
陳曉東與太太王妤嫻
被問到12年來如何實踐這套「盡量」哲學，他細數：「盡量為家庭諗多啲，唔再係小朋友，就盡量檢點自己多啲，亦要降低自己嘅慾望，會為屋企小朋友改變行為，盡量唔拈花惹草。」他笑言，結婚當爸爸後已變成「宅男」，工作以外極少應酬，夫妻之間少有磨擦，而他對太太亦甚少管束：「我原則性好強，一方面好硬，但只要唔觸碰我原則，基本上我都好free，你鍾意點就點，去邊就去邊。」
陳曉東近日穿梭中港宣傳個唱，太太多次陪伴在側。他感激地說：「佢好熱心，後邊幫我處理好多嘢。我係一個原則性好強嘅人，有啲難搞，佢係遷就我多啲。」兩人年紀相差13歲，當年東東將太太從台灣帶到北京這個陌生城市生活，他深感太太為家庭的付出，尤其為他誕下兩個女兒。
談及分別12歲及11歲的女兒，陳曉東自認是「開明爸爸」。他不但不反對女兒將來入行，也不怕她們經歷自己當年在娛樂圈的挫折：「一個人嘅人生，幫得幾多？當佢哋去到咁上下年紀，我會想佢哋有選擇權。人去邊度都有機會受傷，行公園都會跌倒。你仲係細需要我保護嘅年紀，我會拉住你，但人生要自己去經歷，我只會畀意見。」
對於女兒即將踏入青春期，他笑言完全不擔心拍拖問題：「我唔係嗰啲掃興父母，我一啲問題都無！」他更自曝年輕時也曾「叱吒風雲」，認為拍拖正常不過：「最好你唔介意一齊響屋企，你響嗰邊玩，我響呢邊玩，你無阻住我，我無阻住你。注意安全，唔好亂嚟咪得囉。」
陳曉東將於6月19日再度登上紅館，舉行入行30周年演唱會。他期望屆時兩位女兒放暑假回港，與香港家人團聚，一同見證這個重要時刻。
