第一場《The Singleton Just Sing Live in Wonderland》昨日（8日）順利舉行，首日大會邀請JACE陳凱詠、YT周殷廷、女團Lolly Talk為音樂會打響頭炮！
Lolly Talk是夜穿着短裙示人，看得現場觀眾血脈沸騰，並興奮歡呼拍掌，眾成員都好識做，獻唱多首經典女團歌，表示：「我哋好鍾意Twins，《明愛暗戀補習社》係佢哋第一首歌，可以翻唱佢哋啲歌係驚喜！（練佢哋側手翻？）我哋有同排舞師講過，但要時間練吓先，依家唔敢獻醜住，平時我哋唱K都會唱女團啲歌，今次舞台上演出係好開心！」她們又即場考驗粉絲，還即時送出四張專輯哄歌迷，然後叫全場亮起手機伴唱，把Lolly Talk感動得眼濕濕！
JACE穿着短裙長靴登場，還在台上飲酒助興，「其實我咩情況都會飲酒，因為養聲最主要係識保護聲帶、飲多啲水，但係開心反而緊要啲。我見啲外國歌手成日會唱兩句、飲兩啖，一直都好想試吓，所以頭先試咗啦，聽到台下大叫飲杯！」JACE笑指聽到大家問何時開個唱，但現在推出新歌為主，而且想儲快歌成為獨立跳唱歌手。
YT周殷廷壓軸出場，表示很喜歡戶外騷，所以唱到第二首歌已走到台下握手，引得粉絲不斷瘋狂尖叫。他又表現得十分體貼和親民，對粉絲的自拍要求都來者不拒！雖然有人要求他「除衫」，但YT就婉拒，只坐在台前近距離唱歌，氹到粉絲好開心。
