無綫《一周星星》今晚（18 日）邀請張家輝與蒙嘉慧（Yoyo）擔任嘉賓，二人對上一次合作要數到2000 年的《流氓師表》。講到第一次合作對對方印象，家輝笑言：「好瘦，而家好似有啲嘢包住佢啲骨，肥咗靚咗。」至於Yoyo 則憶述當時剛入行算是新人，總之「噏晒對白」、「唔好阻人哋光（打燈）」，不要犯錯就算。
兩人相隔26 年後再合作，在電影中飾演夫妻，談到有沒有為角色做設定，Yoyo自爆：「我有，不過Keep 咗Fat，我記得拍緊嘅時候真係好想減，不過真係減唔到。」引起全場爆笑。她更透露有一場戲要變後生，使出大絕招變瘦，還大爆在日本沖繩拍攝期間家輝的搞笑趣事。
「獨家考古」環節重溫《天地豪情》（1998 年）、《騙中傳奇》（1999 年）、《金裝四大才子》（2000 年）、《陀槍師姐IV》（2003 年）等片段。家輝對《騙中傳奇》特別印象深刻，並大爆拍古裝劇辛酸：「黐住頭套大汗淋漓」、「汗水疊埋雨水長頭髮黐喺條頸度」、「拍完古裝腰都斷」。不過該劇劇情內容爆趣，家輝更公開呼籲希望TVB 新年期間能播《騙中傳奇》：「我喺TVB 唔係拍好多嘢，不過好鍾意呢部劇，好好笑同埋好玩。」至於Yoyo 重溫《K-100》節目片段（2004 年），片段中講到擇偶理想型，她更罕有透露與老公鄭伊健私下生活相處之道。
今集精采焦點，是「你問我答」環節，胡楓（修哥）拍片隔空現身，精靈活潑向契仔家輝提問：「你想於紅館開演唱會嗎？我一定來做嘉賓！」家輝又講到同修哥的淵源，場面溫馨。還有錢嘉樂、黎諾懿、姜皓文隔空提問。
