96年亞姐冠軍陳煒（煒哥）曾因首段婚姻淡出幕前四年，直到2012年轉投TVB再度出發，憑實力由配角躍升為一線花旦，再創事業高峰。近日她與宣萱合作台慶劇《巨塔之后》，兩人互飆演技成為熱話。明年將踏入入行三十年的煒哥，日前接受雷霆881《星光背後》專訪，暢談選美入行、演藝轉變及感謝影帝鄭則仕令她「演戲開竅」，同時亦難忘談及已故雙親對她的深遠影響。
煒哥是家中孻女，與家姊相差十年，坦言父母對她份外疼錫。她回憶道：「爸爸喺我18歲時已經希望我選港姐，但嗰時太細個啦，一來覺得自己學歷唔夠，二來爸爸講嘅嘢唔聽。」後來入行成為亞視藝人，即使經歷低潮，她對家人一直報喜不報憂。直到2008年退出娛樂圈四年、婚姻出現問題時，她亦未有向雙親透露，「媽咪09年開始肝癌，11年離開，嗰陣除咗我返嚟香港，亦有接媽咪去台灣做treatment，佢都有同我前夫一齊生活嘅時間。其實媽咪係睇到我同前夫點相處，好記得佢曾經講過一句：『如果唔啱，分開啦。』聽到佢呢句，突然覺得佢好豁達，唔似以往我心目中忍耐爸爸嘅媽咪，所以最後我決定同前夫分開，都係因為媽媽呢句說話而釋懷。」
2012年，陳煒與台灣前夫離婚後回港復出，加入TVB重啟事業。她透露，在遇上現任丈夫陳國強醫生之前的數年，自己一直心灰意冷：「講真，識我老公時已經47，嗰時好灰，感覺47可能真係無人要啦，感情無任何諗法，所有時間畀晒工作，用工作麻醉自己，唔好有時間諗嘢。」
煒哥與老公因拍《法證先鋒IV》期間，透過黃智賢介紹而相識。當時陳煒因經痛嚴重到幾乎暈倒，「我打電話問陳醫生應該食啲乜嘢藥。結果到中午，佢走咗嚟我屋企送藥，同埋送咗碗粥，覺得佢真係關心我喎，先至慢慢開始。」溫柔體貼的舉動，令煒哥由衷感動。2022年初，煒哥90歲的爸爸離世，她感激老公當時一直陪伴在側，更愛屋及烏地照顧家人：「之前爸爸坐骨神經痛到行唔到，我開工無時間，陳醫生係特登響lunch break由將軍澳去到屯門，照顧我爸爸同幫佢打針，每日睇住佢，我真係好感激我老公。」
回想過去一段失敗婚姻，煒哥直言問題出於缺乏溝通，反觀現任老公最令她欣賞的就是「咩都攤開講」：「雖然我同佢都好I（Introvert內向型人格），但我哋相處會無所不談，每日發生嘅嘢都分享，佢好清楚我，我又好清楚佢，大家就唔使估嚟估去。我所有拍戲拍檔，尤其係男對手，都一定會識得我老公。」
談到老公求婚一事，煒哥笑言：「事前無傾過，但少少feel到，唔踢爆佢啫。點feel到？47歲已經覺得係佢啦，哈哈！遲咗一年喇，因為大家都認定咗對方，要猶豫要諗係最初拍拖階段，觀察佢一段時間，已經決定好啦，爭在佢未求婚啫。」問到婚後有否考慮過生小朋友，她坦言：「佢自己有下一代啦，我真係無乜點諗過，而家我哋兩個幾自由吖。」