汪明荃（汪阿姐）噚日出席謝曉瑩主演嘅網絡版粵劇《重生趙飛燕》首映禮，表示粵劇界首個網絡互動粵劇一定要到場支持粵劇界嘅新突破。心情大靚嘅阿姐仲大爆家英哥唔聽話，呢位愛妻號做錯咩呢？
網絡互動版《重生趙飛燕》有好多創新元素，阿姐表示好似打機咁，觀眾可以玩角色扮演同揀結局，相信會好有趣。汪阿姐被問到會唔會將自己嘅劇目拍成網絡版，阿姐就話要睇下效果先，又話覺得佢同羅家英合演嘅《楊枝露滴牡丹開》幾適合拍網絡版，因為有好多特技效果。另外汪阿姐認為將粵劇拍成網絡版會係大趨勢，始終粵劇都要走出新路。
汪阿姐日前係羅家英陪同下接種新冠疫苗，佢表示打完第一針冇任何不適，但自言好怕打針抽血，要捉實家英哥。佢又透露原本家英哥都打算接種疫苗，但因為糖尿指數太高而暫緩，為此阿姐話佢成日都要提家英哥要戒口，但係家英哥唔係咁聽話，愈提就愈想食。
圖片來源︰汪明荃@Facebook、Instagram
