郭富城周六（26日）晚在深圳舉行巡迴演唱會，太太方媛和大女郭詠希、二女郭詠萱都有捧場。在過去每場演唱會，城城都特設與觀眾互動Battle大跳《Baby Shark》，今次城城讓兩個女兒跟他一齊「比舞」。城城在台上說：「其實講個秘密俾你哋聽，今日除咗在座觀眾外，我兩個女都係觀眾嚟，因為佢兩個呢，已經偷偷哋話要挑戰老竇。」
跟住城城向看包廂上的囡囡問：「你們要不要挑戰爸爸呀？（女兒：要！）嘩！讓我來介紹這是我兩個女兒：郭詠希跟郭詠萱。今天很開心……OK，音樂！」然後3父女一同隨音樂舞動，兩個女兒遺傳舞台王者爸爸的優良基因，表現淡定，尤其最後單手抱腿企動作十分出色，台風十足。
另外觀眾席上有一名8歲小女孩跟城城鬥舞前，城城找來女孩的爸爸傾生仔經，當對方自爆育有4位小朋友時，城城即O嘴扮驚訝企唔穩，還問：「（4個）都係女嗎？」對方回答「3女1子」，並鼓勵城城：「你都要生個仔呀！」
城城隨即轉向坐在包廂的方媛說：「老婆，佢講㗎，粉絲講嘅！」但隨即表示：「隨緣啦！咁我都真係覺得我哋已經好幸福喇！雖然依家3個女，但覺得係天注定嘅。」
