TVB 旅遊綜藝節目《藍朋友・旅朋友》由王祖藍擔任主持，「溫哥華篇」將於下周播出。王祖藍會聯同太太李亞男，拜會定居當地的多位好友，首集嘉賓便是與他相識逾二十載的鍾嘉欣。
嘉欣自 2021 年演出《星空下的仁醫》後，便甚少亮相 TVB 螢幕。今次於節目中，她罕有分享從未對外公開的經歷。育有三名子女的她透露，當年在溫哥華家中親自接生孩子，長女亦在場見證兒子出生。她憶述：「我自己接（生）㗎」、「因為喺屋企吖嘛，你咪接住佢咯」、「我個女都有睇住我個仔出世，我係咪奇奇怪怪呢？我覺得好 Natural，我覺得佢睇住細佬出世，係一種 experience of life，Life is life，佢係血淋淋，But it’s beautiful。」嘉欣敘述時語氣平靜，對比王祖藍震驚的反應，畫面對比有趣。
祖藍形容嘉欣為「超級媽咪」，能夠一邊煮飯、一邊哄孩子入睡。嘉欣表示親身經歷分娩陣痛，讓她更體會母親的偉大。談及母親時，她情緒動容，數度落淚：「我想經歷呢個痛，你知唔知我經歷個痛時經歷緊啲乜？」她續說：「嘩！感動𠻹‥‥‥我可以經歷我媽媽生我三兄弟姊妹嘅過程同感受，對我嚟講好緊要，我成日都好想同我媽媽好Close，我知道佢好辛苦，好努力，去成為好好嘅媽媽，所以我好愛錫佢‥‥‥生 BB 嘅過程我係諗住我阿媽，所以我好有力量。」生命影響生命，大女亦受她影響，曾跟她說希望日後生三個小朋友，還問嘉欣可否幫忙照顧。
重視愛與親子連結的嘉欣，亦坦言自己是「戀愛腦」。當年認識丈夫 Jeremy 後，她第一時間跟閨密李亞男說：「我搵到我嗰個人喇，我好鍾意佢，由頭到腳都鍾意！」祖藍補充，昔日的嘉欣十分看重演藝事業，認識 Jeremy 之後想法出現一百八十度轉變。祖藍憶述當時二人傾談工作，嘉欣表示：「我唔使㗎喇，事業依家唔重要，我以後最緊要係家庭。」嘉欣隨即補充，早年看 TVB 劇集長大，看到佘詩曼、朱茵、蔡少芬、周海媚、陳松伶等藝人，曾夢想可以在 TVB 拍劇，這在從前對她而言是遙不可及的願望。
嘉欣與亞男又於海邊合唱由她創作的歌曲《有一天》，片段穿插三人舊照，畫面溫馨。唱完之後，鍾嘉欣亦幽默自嘲，憶起昔日樣貌：「諗番起我哋大家仲係好瘦、好幼，同埋好白淨」、「依家無論如何都有種老味，少少嘅味喺度。」
