今年10月是陳百強（Danny）逝世30周年的日子，下月7日是他65歲冥壽。93年10月25日，Danny在昏迷中離世，30年後，Danny的生前好友黃嘉豪（David）為故友推出了紀念冊，這位既是Danny唱片公司的同事，也是攝影師身份的友人，原來一直保留着由陳媽媽交給他的Danny遺物，當中包括有封藏多年的十筒珍貴菲林與及相機。David三年前將菲林修復沖曬，一張張Danny珍貴的旅遊自拍照片，近日終於「翻生」。
David說：「我既然有呢個機緣，可以講係一個承擔同責任，好好將佢整理出來。」David最想表達Danny除了是大家公認的偶像巨星，更想令人知道他對攝影、收藏品熱愛的另一面，「Danny係天生藝術家，更加係一個傳奇！」
耗時3年製作完成的紀念本，分成《等》與《典藏》兩冊，David自資出版限量印製一千本，只限歌迷內部訂購，不作公開發售。David今次除了讓《明周》刊登照片，更提供了並未出現在紀念冊內的獨家圖片。這兩本共二百多頁的紀念本，除紀錄了陳百強不同時期的舞台風采，更揭開了Danny對攝影、對藝術收藏熱愛不為人知的一面。David說：「我知道Danny鍾意影相，但點都估唔到佢攝影技巧係專業級！」
《典藏》一冊內，公開了不少Danny旅遊時的自拍照。David說，Danny生前最愛旅遊的國家是美國和日本，兩地分別都去了三十多次，每次跟在Danny身邊的LV袋是他的寶物，「佢去到外國，梗係孭住佢個LV袋，去到美國、日本都有，裏面係寶，就係啲相機、腳架喺晒度。」他說Danny影相「不求人」，而且永遠只影一格，「當時買菲林好平，十零廿蚊卷，但佢就係一個咁妙絕嘅人，佢影相係自拍，只影一張，擺個腳架set好晒，咔嚓一張走人！張張都咁靚，又校到好sharp，你話傳唔傳奇？佢個思維就係對自己有一個信心，同埋完美主義，總之呢張就係最好，亦都唔鍾意花巧！」
拍下紐約世貿中心
從這十筒菲林中，最令David意想不到的，是一連十多張發生在米蘭的相片，「有一條菲林，喺意大利米蘭一個廣場，行開米蘭買衫啲女士或者設計師都知呢個地方（DMAG outlet），但Danny唔似係shopping經過閒逛，有一輯相連續十幾張影咩？講都唔信，原來當時附近有人遊行示威抗議，點解影十張？佢自己自拍就影一張？係咪解釋唔到？」David大膽推斷，「可能當時血氣方剛，我覺得佢有一種大愛主義，等如佢細個都會對呢度不滿、呢度又覺得唔好，點解呢個世界唔公平，應該係來自呢樣嘢。當時啲人遊行話要自由，都做類似東西。」David說陳百強是個社會觀察者，對世情有一種關懷，「佢成名之前有咁嘅火，呢個好難得！」不過這十張遊行的相片，David為免惹來對Danny的揣測，並沒有公開，「我一路收埋，我都考慮到好多問題，總之我冇展示到。」
這些珍貴的相片，全部來自Danny睡房衣櫃內的小櫃子，當時已經發霉了的十筒菲林，是陳媽媽叫David到家中幫忙整理遺物時發現的，「有一袋已經發晒霉嘅菲林筒，陳媽媽話丟咗佢，佢以為係一早登過嘅宣傳相，你當我敏感亦都可能係天意，我話等我睇睇先，我即刻全部收起，我話呢啲唔好丟呀陳媽媽，我話總之你信我，我幫佢收藏好！」封塵多年的菲林，David一直用防潮珠密封，直到三年前，David的起心肝，將菲林帶到東京赤阪的日本富士攝影技術工場修復，竟然能沖曬成功「翻生」。
一張張照片「出土」，除了米蘭的遊行相，更加震懾David眼球，是Danny拍下了美國紐約世貿中心雙子塔的外貌，「總之呢十筒菲林，沖到有七成啦，我好surprise有一張相，係影美國世貿中心，911恐怖襲擊之後變咗一個植物公園空地。世貿中心原貌，Danny好專業用唔同角度影出嚟，依家睇真係好珍貴！你點樣影得返雙子塔？佢個角度影到出面大廈頂，好近好高，我懷疑佢應該喺雙子塔隔離，同一個大廈隔離個角度看穿過去，呢個一定係傳奇！」
（點擊以下圖片放大）
圖片來源：David Wong
