近日天氣酷熱，在家熱不可耐，索性走去公園作慢步跑，跑了數個圈，已汗如雨下，找了張公園凳子休息，正當我拿出手帕抹汗之際，有位女士微笑向我打招呼：
「趙Sir，好開心呢度撞到你，我係你fans，上次你講『小一升學策略』，我都有出席。」自認是我fans的家長說，「可否請教一個小一升學問題？」
我仔細望一望該家長，依稀記得似乎前數星期見過，但近日講座太多，也記不起她問過些什麼了。
「好多謝你參加我的講座，上次你是否問過我某些題目？」我想從她答案中，知道她此次的來意。
「上次我話俾你聽我幫個仔申請幾間直資私小，其中三間『中』，三間係九龍塘小學、聖士提反書院附屬小學同聖方濟各英文小學，我唔鍾意聖方濟各英文小學，因為深水，但我已經去九龍塘小學同聖士提反附小註冊，我問你點樣可以入喇沙小學，你仲話九龍塘小學同聖士提反附小都辦得唔錯，叫我唔使再三心兩意想辦法入喇小。」家長一係唔講，一講便一發不可收拾。
「係，我仲記得提你，如果想入喇沙書院，應該報聖方濟各英文小學，因為喇沙前幾年頗喜歡收聖方濟各英小之畢業生。你個仔已經俾兩間名小學收，仲有乜問題呢？」我奇怪的問。
「雖然你叫我唔好再想辦法入喇小，但我不服氣，叫一個頗有名氣舊生（喇沙）幫個仔寫封『叩門信』，竟然20分都有機會first in（interview）！」
「好難得，沙以前要25分先至有機會作『叩門』面試，不過以前，面試只有一次，只要是舊生，便有九成入返喇小了！你個仔有冇second in！？」
「冇囉，真係唔忿氣！我好鍾意喇沙，今年DSE（中學文憑）十二個狀元之中，喇沙出三個狀元，仲有一個係超級狀元。」
「就係因為咁樣你朝思暮想諗辦法送個仔入喇沙？」我似乎說中了她的心事。
「係囉，雖然你話聖士提反附小同九龍塘小學好，但喇沙點都係好，趙Sir，你可否幫我一個忙，幫我寫封介紹信俾學校？」家長走入正題。
她的要求，令我出乎意料之外，一來我與這個家長不熟，二來我完全不識她的兒子，對一個「生保」人，提出一個這樣的要求，是尷尬之極！
「唔好意思，我是個已經退休的老師，所謂『人走茶涼』，是不適宜寫介紹信俾學校的！」為了使談話順暢一些，我給家長一個建議，「咁啦，教你『亂石投林』這一招！」
「何謂『亂石投林』？」家長眼裏發光。
「每年開學，不少名校會有一兩個小一生去更出名小學或往外國升學，那個時候，小學校長便急於找學生填這些空缺，所以，我提議你於八月尾『亂石投林』，給心儀小學如喇小，發『叩門信』，若然名小學沒有wait list，便一定邀請發『叩門信』的申請者筆試及面試，適合便會於翌日上課。記住，不要太早或太遲發信，一定要八月尾！」
「為何timing咁緊要？」
「因為學校Class List於九月初決定，太遲發大局已定，那時便神仙難救了！」
「明白，多謝趙Sir！」
我也鬆了一口氣！