謝寧昨日出席銀行活動，自言40歲多歲才創業，其曲奇生意愈做愈大，霎眼已經營18年，謝寧在活動上坦言：「我依家62歲，以前啲人話女人40歲一支花，我覺得依家60歲先至係一支花。我個BB已經18歲，依家有17間舖，當然希望香港人方便買到產品，亦能夠衝出香港去到世界各地都有舖頭。」對於每年銷售額過億港元，有否上巿計劃？謝寧表示：「公司交畀一班後生仔管理，佢哋好多新主意，至於上唔上巿就由佢哋去決定，起碼大家都會有個目標，暫時透露唔到，不過我心願當然希望可以敲鐘啦。」
在工作壓力巨大下，仍堅持平衡生活，謝寧說：「生活與工作唔平衡好難撐落去，我平時會插花、煲韓劇、食瓜子減壓，每星期有3日跑步，勤力敷mask保養，少食碳水化合物。」謝寧指自己會退而不休，不會停止工作，最多只改變一種生活態度及方式。對於年齡及工作焦慮，她會用運動放鬆心情，以開朗的性格面對困難，減少埋怨，她說：「要睇得自己有嘅嘢，唔會睇得自己冇嘅嘢，我會成日提醒自己。」母親節將至，謝寧說：「我有媽媽，又係婆婆，基本上屋企四代同堂，每逢過節都好熱鬧，大棚人一齊食飯最開心，我會下廚，小朋友依家都好珍惜阿媽煮嘅嘢。」
談及踏入「花甲之年」，謝寧展現出極強的前瞻性。她透露自己並非到了60歲才思考未來，而是早在40、50歲時已開始規劃，為人生下半場打好堅實的財務基礎。至於保持年輕的秘訣，謝寧笑言在於對世界擁有追求新事物的好奇心。