《臥底嬌娃》昨晚（16日）一集劇情聚焦回顧潘奕風（馬貫東飾）及蘇嘉盈（李海銅飾）的「綠袖子情緣」，內容極盡洋蔥。擁「藝訓班班花」美名的李海銅雖仍是新人，但昨晚卻幾乎擔起整集劇，火力全開展現Gfable一面，包括大晒甜美聲線、溫柔眼神、冧豬甜笑＋可愛扁嘴，再加上對奕風千依百順、善解人意，入得廚房又出得廳堂，堪稱「絕世好女友」。網民對於李海銅的演技亦是有讚無彈，由於李海銅與阿東發展的是「電話情緣」，故有不少場口李海銅只能靠聲線表達，但難得李海銅全程單憑聲音亦演繹自然，而且散發着強烈的溫柔感，令不少網民大嘆「沉晒船」，IG Followers人數一夜之間更由原本的16,000激增至19,000，短短三小時內升幅高達20%。
談到與馬貫東演情侶Sweet到震，李海銅感激馬貫東無私犧牲休息時間貼心指導：「今次係同阿東第一次合作，佢好好呀，佢雖然個拍攝日程都好tight，但佢寧願犧牲自己返屋企休息嘅時間，放咗工都會陪我繼續討論點樣夾。雖然佢經驗豐富過我，但佢都好尊重我嘅意見，大家真係會拋晒所有idea出嚟討論，去夾一個大家認為最好嘅演繹，同埋好感謝佢喺討論嘅過程中教識咗我好多嘢。」談到劇中角色溫柔賢淑，李海銅笑言私下的她其實是男仔頭一名。
對於纖腰獲讚，李海銅自爆其實是易肥體質，故每次拍劇前都要節制飲食，朋友更叫她「肉肉臉」！談到昨晚「真．女神」風場口截圖在網上瘋狂洗版，李海銅笑指背後笑料百出：「我係第一次被吹風機兜面吹，平時睇劇見到啲女演員同事喺吹風機效果吓勁靚，但到我自己試嘅時候，其實係NG咗幾次，因為啲風一吹埋嚟，我表情就管理唔到，一係闔埋咗眼，一係面容因為食咗啲風有少少扭曲。」
