林嘉欣獲法國政府授勳 超流利法文致辭

林嘉欣不經不覺擔任法國五月藝術節大使（Le French May）已踏入第8個年頭，每年都會遠赴法國的她，與當地來自不同界別的藝術家進行文化交流，最近更獲法國政府授勳為「Chevalier de l’Ordre des Arts et des Lettres」，以表揚她多年來努力宣揚法國藝術。

林嘉欣日前由丈夫袁劍偉、還有兩個囡囡陪同下，到法國駐港領事官邸接受授勳。嘉欣笑言去年4月收到授勳通知時，以為被整蠱，她解釋：「因為封信係由加拿大政府發出，話我獲法國政府授勳，我睇咗封信好多次，仲問我先生『係咪呃人㗎？疫情仲有呢啲騙案？』後來先知，原來我因為喺加拿大出世，法國嗰邊要認證我嘅國籍，所以封信由加拿大寄出。」

當知道授勳一事如假包換，嘉欣坦言有一種超現實的感覺，故在授勳當日，除以法文致辭外，更安排兩個囡囡協助法國領事，進行授勳儀式。
「兩個囡囡負責托住個放有勳章嘅枕頭仔行出嚟，我同佢哋喺屋企綵排過，但屋企個枕頭大好多，哈哈，所以嚟到領事館，我哋都有綵排多一次，之前仲帶佢哋買過條新裙仔，因為我兩個囡囡好似野人，通山跑，平日著嘅衫穿晒窿，所以一定要帶佢哋去買衫。」
授勳儀式完成後，嘉欣更以法文及廣東話致辭，她說：「因為冇得飛，太耐冇去法國，冇機會講，法文大退步，所以我搵咗一個好好嘅法國朋友幫我翻譯致辭內容，我衷心多謝French May團隊，令我過去八年，認識到好多世界頂尖嘅藝術家，我亦多謝屋企人，包容我每年去法國交流，仲有多謝林建岳博士，一直背後支持我，不過佢去咗北京開會嚟唔到見證，佢話返香港會再同我慶祝。今次能夠得到呢個榮耀，我會如常學習，如常生活，亦都會教導囡囡，要努力尋找自己嘅夢想，我一直身體力行做一個榜樣，希望佢哋會知。」

點擊睇更多林嘉欣靚相：

林嘉欣法文致辭內容：

我想先多謝法國文化部同French May團隊，多謝佢哋嘅獨特眼光，令我喺呢八年裡面，可以認識世界頂尖嘅藝術家、舞蹈家同音樂家，可以同佢哋交流，學習。
跟住我想多謝林建岳博士，佢一直喺背後默默支持我，容許我去探索同發展。
最後我想多謝我嘅好朋友，同埋屋企人，喺呢八年，我絕對需要佢哋嘅了解同支持。

過去呢兩年，成個世界都經歷咗好大嘅變遷，亦令好多人嘅生活產生極大嘅變化，好不幸，呢啲都係壞嘅變化。但係我相信壞嘅時刻終會過去，我希望喺不久嘅將來，藝術可以重新出發，再次啟發我哋對生命嘅熱情，尋找生命嘅重心。多謝大家。