鄭秀文與張敬軒首度攜手，叱咤903主辦《拉闊音樂會Most Wanted 鄭秀文x張敬軒》將於11月1日（星期六）在亞博舉行。音樂會第二款主題造型今日（29日）曝光，造型以「光」為概念，兩位主角換上螢光粉紅及淺綠色型格西裝，製作團隊包括兩人御用演唱會音樂總監Johnny Yim及梁基爵。Sammi與軒公特意加入票選環節，各自揀選五首作品，由樂迷投選心目中的「Most Wanted」歌曲，最高票數的兩首作品將於音樂會即場演繹。投票活動由今日中午 12 時起至星期五中午 12 時止，Sammi的五首作品包括《親密關係》、《默契》、《隔著玻璃》、《男仕今天你很好》及《很愛很愛你》，軒公揀選了《P.S. I Love You》、《披星戴月》、《留低鎖匙》、《明明他已離開你》及《形影不離》。
軒公大讚Sammi十分專業：「Sammi從未俾我哋任何前輩嘅壓力，而佢嘅前瞻性讓我哋睇得更遠。佢唔係將難度或技巧放喺第一位，而係著重嗰件事handle得好唔好，效果出到嚟點樣，同埋好唔好玩。大家一有新嘅idea，佢就會表現得好雀躍。」軒公好感激Sammi的提攜：「我覺得好多嘢都喺Sammi度嚟，我第一次出埠做演唱會嘉賓，就係去Sammi喺馬來西亞雲頂舉行嘅演唱會。Sammi一直關顧樂壇，提攜後輩同埋新人，我希望這份傳承嘅精神一代一代傳落去。」
Sammi亦欣賞軒公對樂壇有使命感：「見證住佢喺樂壇不斷蛻變同成長，我知道佢一定付出咗好多努力。我唔相信僥倖就能走到今日，只相信持續努力同堅持先會有呢個成績。佢平時對樂壇、對新人嘅關心，已經超越咗歌手嘅身份同責任，所有人都睇得到佢身上係有一份使命感。」
