吳業坤在《萬千星輝頒獎典禮2025》獲「飛躍進步男藝員」時真情流露，連TVB官網都用了他在台上激動爆喊的照片出Post，坤哥事後忍不住轉發該照，留言自嘲「點解咁樣衰」！
得獎後沉澱了一日的坤哥，在社交網發布兩張當日「四正」靚相，及捧住獎分別跟馬國明、陳山聰、陳展鵬、李施嬅、鄧智堅等人合照，當然少不了《新聞女王2》眾演員齊捧獎的大合照，並再重發跟日籍妻子濱口愛子舉杯祝賀他的開心照。坤哥解言：「好想話俾大家知點解我會咁感動，因為由細到大睇電視覺得呢個獎係屬於好努力嘅藝人，由十年前第一次提名開始到十年後嘅今日終於攞到，好似實現咗細個嘅夢樣一樣，而呢個獎你幾叻都好，其實一世人會過咗時間同只可以攞一次。
「呢程車我搭咗接近16年，中間唔夠膽嗌落車，兜兜轉轉終於攞到呢個獎。多謝識照顧我嘅所有人，由《超級巨聲2》開始，第一次拍攝旅遊嘅《廣州闖蕩》，第一次拍攝劇集嘅《法網狙擊》，音樂節目、兒童節目、做棋、《愛．回家》、《跨世代》、《迷》同等等等等，如果無呢啲經歷我都唔會成為今日嘅我。有啲人贏在起跑線，有啲人由小嘍囉開始，但人生沒有終點，繼續爭氣，繼續行落去，一定會見到你所想見的風景。
「15年前嘅坤哥可能代表係搞笑同埋低能，15年後希望可以加多一份認真同埋專業，多謝你哋，我會唱每一首歌做好每一個角色，希望2027叱咤台上見」。
