完成謝票環節後，宣萱與歐瑞偉亦歸隊，與數百名粉絲齊齊睇電視，當劇情播放林峯飾演的趙盤大獲全勝，霸氣宣告自己的天下要永存萬世、歲歲不休時，現場觀眾齊聲高呼「萬歲、萬歲、萬萬歲」，氣氛非常熱烈。
在互動聊天環節中，司儀C君邀請宣萱即場重演經典點穴場面，只見她在古天樂肩膊前左點右點，粉絲即時起哄。之後古天樂亦趁機「報復」，笑問大家是否想睇他點宣萱穴，還打趣說：「你篤得咁過癮吖嗱？」最後古仔伸手篤向宣萱背脊，場面搞笑。另外，滕麗名與古天樂重演大結局中善柔伏在項少龍心口、試探三女共侍一夫的一幕，滕麗名乘機講出角色當年未有講出口的心聲：「其實我好想叫你留低我！」其後司儀陸永再拉埋歐瑞偉上台，安排在「Plus+多元宇宙版」中曾親吻古仔的他伏在古仔心口，歐瑞偉即扮嬌嗔說：「點搞呀，俾人搞掂咗！」
來到活動尾聲，眾主演亦真情流露，宣萱感性表示：「你哋覺得我哋帶咗好多快樂畀你哋，其實我哋呢幾個月睇到你哋嘅反應、支持同分享，都帶咗好開心嘅感覺畀我哋。好多謝你哋畀機會我人生經歷呢樣嘢。」郭羡妮更感動落淚，她說：「25年前拍第一部劇，25年後好多嘢都改變咗，但大家都好似冇變過，真係好感動。」為答謝現場觀眾支持，眾演員帶領全場大合唱《天命最高》。古仔亦獻唱新歌《世紀大騙局》，林峯則送上經典歌曲《愛在記憶中找你》助興。
更多現場圖輯：
