61歲林映輝在劇集《俠醫》中飾演陳豪的細姨鄧佩霞，昨晚（9日）播出陳豪飾演的凌為民，拜託她幫忙調查任遠公司帳目，佩霞向為民透露任遠確有不明帳目，但礙於自己欠公司債務、故長期只能啞忍兼被剝削。
性格蛇𠺌的佩霞，按凌為民要求嘗試調查及勸阻「壞蛋三人組」鄧世鏗（丁子朗飾）、鄧力圖（鄭子誠飾）及甘雁鳳（江欣燕飾）惡行，可惜反遭三人冷嘲熱諷，長期飽受欺凌及剝削的佩霞，同時還要面對家中兒子家俊（馮皓揚飾）的不生性，最終壓力爆煲瘋狂咆吼兼崩潰，相當慘情，而輝仔亦演出了角色的苦況、內心掙扎及應有的層次，令網民大表同情。
以專業主持形象成功入屋多年的輝仔，謙稱因拍劇經驗相對較少，起初拍攝時有很多不適應：「今次好多謝佢哋大膽起用我，都好大挑戰，但因為我好耐冇拍劇，好多嘢都要適應。最難忘係有次拍完通頂戲、第二日要開《東張》，因為做《東張》講求專注，所以對體力都係考驗，都好多謝《東張》願意配合我，俾我盡早拍晒啲訪問先。」
輝仔續指很感謝劇中壞人子誠及欣欣鼓勵及陪伴度難關：「子誠真係俾咗好多正能量，佢同欣欣因為劇入面都會鬧我、欣欣甚至會篤我，但其實喺現實子誠見到我咁佢好心痛，因為佢覺得我應該係被保護嘅。同埋佢成日讚我做得好，俾咗好多鼓勵我。欣欣佢好早做晒啲功課架，佢成日Share自己啲功課俾我，又教我睇咗分場先咁，好多謝佢咁無私分享。」
至於在劇中跟「自閉症姐姐」譚凱琪（Zoie）演姊妹的Kelly，笑指可能受可愛Zoie影響，自己也變可愛了，並坦言私下的自己其實很傻氣：「我自己都鍾意同啲friend講笑、做啲傻嘢咁，所以大家平時覺得我係女神呀、或者係好斯文嘅專業女性其實係錯覺嚟，羅穎琛其實比較會貼近我自己本人多啲嘅。」
