著名填詞人鄭國江屹立樂壇55載，撰寫的廣東歌歌詞超過2千多首，將於5月假灣仔伊館舉行《鄭國江詞名一生紀念群星演唱會2026》。參加演出的包括林子祥、譚詠麟、區瑞強、葉振棠、鍾鎮濤、肥媽、黎瑞恩、曾路得、陳美齡、林志美、露雲娜、周國豐、李思捷等。
鄭國江、區瑞強、肥媽及鄭子誠今日（14日）出席發布會，區瑞強表示邀請歌手演出時，一呼百應，「大家知道鄭老師開作品展，都爭相出席支持。」鄭子誠雖然無份演出，但依然堅持出席支持鄭老師，「因為鄭老師喺香港樂壇當中，帶畀我哋嘅貢獻實在太大，我喺人生裏面經歷過好多高低起跌，每個階段都有鄭老師嘅歌陪住我，所以我今日要用行動嚟支持。」Albert形容鄭老師是「詞神」，作品總能夠令到歌手走紅，「佢每次都寫『中』畀啲歌手，好似譚詠麟好少唱劇集主題曲，《誰可改變》就係老師寫，又好似鄧麗君冇唱過廣東歌，《漫步人生路》一唱又紅。」
肥媽直言演繹鄭老師作品能讓她養大6個仔女同17個孫，「老實講鄭老師啲歌幫我搵咗好多錢，去到全世界登台，唱鄭老師嘅歌利市都多啲，但我一定唔可以唱錯歌詞，因為每個觀眾都識得唱晒啲歌，所以我都好多謝鄭國江老師，雖然佢冇作過歌畀我灌唱片，但係我都搵到錢！」
鄭老師被幾位嘉賓的話，感動到用手巾拭淚，鄭老師表示寫了55年歌詞，從沒有想過其作品可以給予別人力量，「我寫歌詞可能係無心插柳，但係首歌去到某個人某個時間，令到佢有好大嘅感觸，呢個係我估唔到嘅影響力，好似我試過有次同太太去尖沙咀飲茶，有個年輕人走嚟叫我鄭老師，佢話『我真係你教小學嘅學生嚟』，佢話出嚟工作唔如意，跟住收埋自己變咗隱閉青年2年，但係有晚聽收音機聽到陳百強嘅《飛出去》，畀到鼓勵佢跟住第二日去買報紙搵工，一路做到而家都好好，仲見返爸爸媽媽，其實我都唔記得我寫過呢首歌，歌詞好簡單，但原來係某個情景下，會令人有感觸，呢啲事係令我最感動。
更多圖輯：
