Rock留言：「2024年6月12日，係我喺愛回家出現嘅第一集，今日2025年6月12日，係我加入愛回家嘅一周年！開心嘅時光飛逝，呢一年過得好快，亦都好充實，嘗試過好多裝扮，好多搞笑嘅劇情，見到自己個角色性格逐漸呈現更多比觀眾睇到，遇到唔同嘅導演，唔同嘅編劇，唔同嘅PA，多謝監製，多謝大家俾機會我去演，同埋肯教導我！一班朝夕相對嘅公司同事們，每次返工都好似返屋企，多謝大家睇住我，包容我啲蝦碌嘢。（有張相思明指住支藥油，係揸機嘅哥哥放喺度俾我借視線，佢哋知我經驗唔夠驚我做唔到戲，佢哋真係好貼心）。
「（其實到而家都唔係好敢相信…好似發夢咁），我好開心可以加入愛回家呢個大家庭！加入咗龍家！真係好似多咗個爹哋囉囉攣（羅樂林）、媽咪靚靚三太，仲有大家姐、姐夫、兩個阿哥、Auntie melody，仲有個阿叔同舅父。一齊對稿，一齊食飯，一齊慶祝生日，一齊過節日，同完自己屋企人過，都一定會同龍家一齊過！多謝觀眾俾機會我，聽到好多鼓勵嘅聲音，以後繼續努力，做好『呀Joe』帶多啲笑聲俾大家！大家好，我係愛回家嘅阿Joe龍舟！」
