【難忘阿叔】林尚義世界盃經典回帶

《世界盃》上星期開鑼，球迷睇Viu TV免費直播，有人讚旁述專業，亦有人彈冇氣氛，悶到瞓着，開始懷念以前一班足球評述員，搞笑吹水雖然有時頗廢噏，但勝在熱熱鬧鬧，不是標準球迷也看得開心，其中最令人懷念的是2009年離世的阿叔林尚義，講起阿叔，過往世界盃他有不少經典場面實在令人難忘。

扮巴士阿叔

2006年世界盃在德國舉行，那年冠軍是第四次奪冠軍的意大利，記唔記得？那年無綫的宣傳片，搵阿叔扮巴士阿叔，林敏驄則扮被他罵的後生仔，阿驄對着電話說：「聽講阿叔最後一屆講波，驚佢有壓力喎。」阿叔聽到後彈起，大聲話：「你有壓力，我冇壓力！」阿叔的演技兼喜劇節奏感認真唔錯。

偷偷食煙

1998年世界盃主辦國是法國，兼捧走雷米金盃，你又記唔記得？林尚義飛到法國現場講波，其中一場，在TVB直播室的李克勤將個咪交俾法國球場的主持，包括郭家明、韓毓霞，坐在鏡頭右邊的阿叔在較遠處，當郭家明在說話時，阿叔低頭沒望鏡頭，還悄悄從褸袋掏出一包煙，拿了一根銜着，準備點火前才發現出了鏡，偷偷放低扮冇嘢，錄影廠眾人已經睇到兼爆笑，克勤還搞笑說：「我哋俾少少時間阿叔食少少嘢。」整件事成了球迷至今難忘經典。

 

火拼陳譚新

2002年世界盃在南韓和日本舉行，因為兩地跟香港時差只差一小時，很多賽事在香港日間舉行，巿民在街頭大電視前睇波，大家記憶猶新，那年冠軍是第五次奪冠的巴西。有一場賽事，同場擔任旁述的足球裁判陳譚新為球證判錯球講說話：「球證盡量會做到很公道，只是犯錯無可避免。」此話令阿叔火都嚟，他黑晒臉大罵：「受唔到壓力，唔好學人做球證！」然後擰歪臉，唔望陳譚新的方向，阿叔顯然動了真火，現場觀眾則拍手歡呼認同阿叔說法，而其他主持如陳百祥、李克勤只好講笑話令火藥味降溫。阿叔有火，好多球迷都好掛住你㗎。